Abalinda eddagala lya Johnson and Johnson erigema COVID minisitule ekabatemye

Okwawukanako n’ebika by’eddagala ebirala okuli; AstraZeneca, Sinovac, Moderna Pfizer n’ebirala, omuntu kimwetaagisa okugemebwa emirundi ebiri mu bbanga eggere okumalayo ddoozi, Johnson and Johnson ofuna empiso emu yokka ddoozi n’eggwaayo,eno y’ensonga lwaki bannayuganda bangi babadde balyesunga.

Si 3

Dr. Daniel Kyabayinze  akulira okulwanyisa endwadde ezibalukawo wansi wa minisitule y’ebyobulamu (Principle epidemiologist) ng’asinziira mu musomo gwa bannamawulire abasaka eby’obulamu (Health Network for Journalists Uganda) ogwagendereddwaamu okuteekateeka bannayuganda ku ndwadde ezigwa obugwi naddala Covid-19 eyeeyubula buli kiseera mu nsi yonna, yategeezezza nga ddoozi z’eddagala obukadde 9 ekika kya Johnson and Johnson minisitule lyeyasasula okuva mu Bubirigi (Belgium) zaabalondemu so ssi buli omu.

“Singa Gavumenti en’etuusa ekiseera ky’okugema abantu ne eddagala lya Johnson and Johnson abasinga lye beesunga, lyakuweebwa abo bokka abakola emirimu egibakweka nga balwawo okulabika okugeza; abalunzi abatambula n’ensolo zaabwe okwetoloola eggwanga(Pastoralists), abavubi, abavuga biirukululana n’abalala abagwa mu kkowe eryo,” Kyabayinze bwe yakakasizza.

Dr. Misaki Weyengera akulira akakiiko akeebuuzibwako ku kulwanyisa okusaasaana kwa Corona mu ggwanga yalabudde bannayuganda ku mbeera y’okugattika ebika by’eddagala nti abakikola banditeeka obulamu bwabwe mu matigga kuba teri kunoonyereza kukakasa ku biyinza kuva mu mbeera eno. 

“Mu kiseera kino tuli mukunoonyereza ebisobola okuva mu kugemebwa n’ebika by’eddagala ebisukka mu kimu, naye emikisa mingi nti tebisobola kuba birungi y’ensonga lwaki tukubiriza bannayuganda okukozesa ekika kimu ate ddoozi ziggweeyo,” Weyengera bwe yalabudde.

Gavumenti yatumya ddoozi za Johnson and Johnson obukadde 9 wabula mu kiseera kino waakafunikako emitwalo 657,600 wabula December bw’anatuukira nga ziweddeyo zonna