Bukedde TV 1 ereebezza ttivvi mu Uganda

BUKEDDE TV 1 eyongedde okuleebya emikutu gya ttivvi gyonna mu Uganda, nga kati ye ttivvi esinga okulabwa olwa pulogulaamu zaayo enganzi nga zisanyusa ate nga ziyigiriza. Okunoonyereza okwakoleddwa ekitongole ky’ensi yonna ekya IPSOS.
Abakozi ba Bukedde TV 1 okuli; Ssanyu Robinah Mweruka, akusomera amawulire Agataliiko Nfuufu, Josephat Sseguya ow’olugambo, n’abalala abakuweereza Pulogulaamu zo enganzi, okunoonyereza kwalaze nga bali waggulu nnyo. Amawulire nga Agataliiko Nfuufu, agasinga okulabibwa mu Uganda gabeera ku Bukedde ttivvi
1 buli lunaku, okuva ku ssaawa nnya okutuuka ku ssaawa ttaano ez’ekiro.
Maneja wa Bukedde TV, Richard Kayiira, yagambye nti ebiyambye Bukedde okweriisa enkuuli, mulimu okusitula omutindo gw’amawulire, okwongera ebirungo mu pulogulaamu ez’enjawulo okugeza Ekyenkya, omuli obunyomero obusanyusa ng’emboozi za boda boda, amawulire agakwata ku Bassereebu, agakutuusibwako Musa
Ssemwanga, olugambo ne Josephat Sseguya kwossa ebizimba abantu ng’akanyomero k’amawulire agafa mu kitundu kyo akakutuusibwako Terah Kaaya, enkola ya bizinensi.
Pulogulaamu endala eziggyayo ebizibu abantu bye bayitamu mu bulamu obwa bulijjo, n’okubayamba okufuna obwenkanya, okugeza Fayiro Ku Mmeeza ne Taasa Amakaago.
Kayiira yeebazizza abakozi ba Bukedde TV, abakola obutaweera okulaba nga TV esigala waggulu.
Akulira Vision Group, Don Wanyama yasabye aba bizinensi okwongera okulanga ne Bukedde, basobole okutumbula bizinensi zaabwe kubanga y’esinga okulabibwa.
Ate omusunsuzi wa Vision Group ow’oku ntikko, Barbara Kaija yeebazizza abalabi ba Bukedde Tv, abasoma olupapula lwa Bukedde, abawuliriza Bukedde Fa Ma n’abettanira omukutu gwa bukedde ku Yintanenti.