TOP
  • Home
  • Ageggwanga
  • ‘State House’ ekozesa amazzi ga bukadde 6 buli lunaku!

‘State House’ ekozesa amazzi ga bukadde 6 buli lunaku!

By Ahmed Mukiibi

Added 19th May 2017

ABABAKA ba Palamenti bawuniikiridde bwe bakitegedde nti amaka g’Obwapulezidenti gakozesa amazzi ga bukadde mukaaga olunaku!

State 703x422

Amaka g'obwapulezidenti e Ntebe

Kino ababaka abatuula ku kakiiko aka bajeti akakulirwa Amos Lugoloobi (Ntenjeru - North) baakitegedde Lwakusatu nga basisinkanye Minisita w’Ensonga Ezobwapulezidenti Esther Mbayo Mbalakubuza bwe yabadde abannyonnyola ku nsimbi obuwumbi 23 n’obukadde 187 ezeetaagibwa mu bwangu okuddukanya amaka g’Obwapulezidenti (State House).

Minisita Mbayo eyabadde n’abakungu b’omu maka g’Obwapulezidenti, yategeezezza nti obuwumbi 23 bazeetaaga mu bwangu okubasobozesa okumalako omwaka gw’ebyensimbi 2016/17 oguggwaako mu June kubanga ssente ezaabaweebwa zaggwaawo dda.

Yalaze n’ensimbi obukadde 615 ezeetaagisa okusasulira bbiiru z’okukuba amasimu n’obukadde 220 ez’okusasulira amabanja g’amasannyalaze.

Ababaka baatadde ku nninga minisita Mbayo ku kye baayise okwejalabya n’okuyiwaayiwa ssente mu kaseera ng’embeera y’ebyenfuna mu ggwanga mbi nnyo.

Ensimbi ezo amaka g’Obwapulezidenti ze gasaba ze zimu ku buwumbi 523 n’obukadde 935 Gavumenti ze yasabye Palamenti ng’ennyongereza okuziba ebituli mu bajeti y’eggwanga.

Minisita Mbayo yatemyetemye ensimbi obuwumbi 23 n’obukadde 187 nga bwe zeetaagibwa nga kuliko obukadde 365 ezeetaagibwa okusasulira amazzi ga State House mu bbanga eribulayo.

Ensimbi ezo bwe zigattibwa ku zaasooka okussibwa mu bajeti ya 2016/17 okusasulira amazzi, ababaka baakizudde nga buli lunaku amaka g’Obwapulezidenti gasaasaanya obukadde mukaaga ku mazzi gokka!

Ensimbi endala amaka g’Obwapulezident ze geetaaga ziri obuwumbi 9 n’obukadde 550 ez’okutambula kwa Pulezidenti Museveni munda mu ggwanga mu bbanga eribulayo okumalako omwaka gw’ebyensimbi 2016/17.

Waliwo n’ensimbi obuwumbi 3 n’obukadde 500 ez’okutambula kwa Pulezidenti Museveni ebweru w’eggwanga mu bbanga eribulayo okutuuka ku bajeti ejja.

Obuwumbi 5 n’obukadde 28 zaakukola ku byakwerinda ate obuwumbi bubiri n’obukadde 434 zaasaasaanyizibwa mu kakiiko Pulezidenti ke yassaawo okubuuliriza ku mivuyo gy’omu Yunivaiste e Makerere.

More From The Author

Emboozi z’omuwandiisi endala

Emboozi endala

Kuba 220x290

Batandise kaweefube okuyamba abaana...

Omubaka wa Makindye East, Ibrahim Kasozi eyasoma n’omugenzi era abadde mukwano gwe yasabye watandikibwewo ensawo...

Dragonboat6 220x290

Ssekandi awadde ab'amaato akamwenyumwenyu...

OMUMYUKA wa Pulezidenti w’eggwanga, Edward Kiwanuka Ssekandi aleese abavuzi b’amaato akaseeko ku matama bw'alagidde...

Taekwondomay282017ambassadorscup5 220x290

Babiisanyizza mu mpaka za Tae Kwondo...

Abazannyi ba Rwanda beefuze empaka za Tae Kwondo eza Ambassadors Cup ezibumbujjidde mu Lugogo Indoor Arena okumala...

Cranes1 220x290

Cranes etandise kaweefube okuddayo...

UGANDA Cranes wansi w’omutendesi Micho Sredojevich enkya ya leero etandise mu butongole okutendekebwa mu kisaawe...

Kcca12 220x290

KCCA ne Express buli omu awera...

ZAAKUDDA okunywa akawungeezi ka leero nga kirabu ebbiri ezimu ku zisinga amaanyi mu mupiira gwa Uganda Express...