TOP

Museveni agguddewo Mapeera House

By Musasi Wa

Added 11th June 2012

PULEZIDENTI Museveni agguddewo Mapeera House, ekizimbe amatiribona ekya kalina19, ekiwemense ddoola obukadde 40, mu za Uganda obuwumbi 100.

2012 6largeimg211 jun 2012 072735583 703x422

Bya  Ahmed Mukiibi

PULEZIDENTI Museveni agguddewo Mapeera House, ekizimbe amatiribona ekya kalina19, ekiwemense ddoola obukadde 40, mu za Uganda obuwumbi 100.

Wakati mu ssanyu n’okukuba obuluulu, Pulezidenti yasaze akaguwa  ku ssaawa mwenda ez’olweggulo okuggulawo ekizimbe kino ekizimbiddwa kkampuni ya Roko mu ngeri ey’obukugu.

Ekizimbe kino nga kye kitebe ekikulu ekya Banka ya Centenary, kyabbuddwamu Faaza Lourdel Simeon Mon Pere ‘Mapeera’, Omuminsani eyaleeta eddiini ey’Obukatoliki mu Uganda mu 1879.

Kya myaliro 19 ng’esatu giri wansi mu ttaka era gya kusimbako mmotoka. Emyaliro ena egisooka ku ngulu giri  mu dizayini ey’eryato, akabonero akalaga eryato Fr. Mapeera  lye yasomokerako ku nnyanja Nnalubaale  ng’ava e Tanzania okutuuka e

Munyonyo mu Uganda olugendo olwamutwalira emyezi kkumi.
Emyaliro egiri mu dizayini y’eryato ze ofiisi za Banka ate emyaliro 12 egiyitamu waggulu gyakupangisibwa ebitongole, kkampuni n’abantu ba bulijjo.


Ekizimbe kya Mapeera Pulezidenti kye yagguddewo eggulo. Ekif: Enock Kakande

Omukugu mu by’okukuba pulaani z’ebizimbe, Henry Ssentoogo eyakulira Pulojeketi ya Mapeera House yategeezeza nti ekizimbe kino  kye kimu ku bizimbe ebisinga obugumu mu buvanjuba n’amasekkati ga Afrika. Omukolo ogw’okuggulawo ekizimbe kino gwakulembeddwamu Ssaabasumba ow’Esazza ly’e Gulu, John Bapist Odama mu kiti kye nga Ssentebe w’olukiiko lw’aba Episikoopi (olukiiko lw’abasumba  Abakatoliki).

Odama eyabadde anekedde mu Kasoko eyakakobe ng’asuuliddeko ekyambalo  ekya ‘Sapulisi’ yasabidde ekizimbe essaala eyatutte eddaakiika kkumi  nga Pulezidenti n’abasumba bayimiridde  mu kisinge ekinene  ku mwaaliro ogusooka.

Oluvannyuma Ssaabasumba Ondama,   Kalidinaali Wamala, Ssaabasumba wa Kampala, Cyprian Kizito Lwanga, n’abalala yamansidde amazzi ag’omukisa   mu kizimbe.

Pulezidenti yagambye nti  okuggulwawo kwa Mapeera House, ye ntobo enywevu  Centenary Bank gy’etaddewo mu kuzimba ‘ekibbo’  n’asaba aba Banka eno okumuyambako mu kukunga Bannayuganda abasoba mu bitundu 68 ku 100 abakolerera emmere ya leero bave ku  mbeera ey’okukolera omumwa batandikewo emirimu egivaamu ssente.

Minisita w’Ebyensimbi, Maria Kiwanuka yasuubizza nti gavumenti yakwongera okussaawo embeera esobozesa amakampuni n’ebitongole eby’obwannannyini  okukola bizinensi zaabwe nga bakola enguudo , amasannyalaze n’ebirala ebigenderako.

Ssentebe w’olukiiko olufuzi olwa Centenary Bank, Polof. John Ddumba Ssentamu  yategeezezza nti ssente obuwumbi 100 zonna  ze bazimbyemu ekizimbe za bakasitoma tekuli zaavudde bweru oba mu Vatican. Banka eno erina amatabi 54 ng’ekozesa abantu 1600. Yagambye nti ebyobugagga bya centenary Banka  kati biri mu buwumbi 1000 era omwaka 2011  baakoze amagoba ga  buwumbi 47, n’asuubiza okwongera okufaayo ku bakasitoma.

Museveni agguddewo Mapeera House

More From The Author

Emboozi z’omuwandiisi endala

Emboozi endala

Ji1 220x290

Temumenya wooteeri Kkwiini mwe...

Temumenya wooteeri Kkwiini mwe yasula’

Mag1 220x290

Balongoosezza eddwaaliro ly’e Bugiri...

Balongoosezza eddwaaliro ly’e Bugiri

Yu1 220x290

Abapoliisi 3 abagambibwa okubba...

Abapoliisi 3 abagambibwa okubba e Ntinda basalirwa Lwakutaano

Ju1 220x290

Abachina basuubirwa okuzimba e...

Abachina basuubirwa okuzimba e Namanve mu September

Nu1 220x290

Bagabye obuyambi bw’emikono n’amagulu...

Bagabye obuyambi bw’emikono n’amagulu