Kirabira (wakati) ng’ayogera n’aba UTODA. Ku ddyo ye Chris Sengooba

Bya Herbet Musoke

ABABAKA ba Gavumenti mu Kampala bagumizza baddereeva ne bannannyini mmotoka abeegattira mu kibiina kya UTODA nti bakyaliwo era baakusigala nga bakolagana ne KCCA mu by’entambula.

Ababaka okwabadde  Alice Muwanguzi, owa masekkati ga Kampala, Rose Kirabira n’owa Makindye Hussein  Kyeyune  baagumizza aba UTODA nga bagamba nti wadde kontulakiti yaabwe  yaggwaako ekyalina omugaso mu by’entambula.

Ng’ayogerera mu lukiiko olwakubiddwa ku Sharing Hall e Nsambya, RCC Alice Muwanguzi yagambye nti “UTODA tukyagyetaaga okuyamba abakadde, abaana, abateesobola n’okuyamba ku bulippagano bw’ebidduka nga bw’ebadde ekolagana ne poliisi”.

Ate ssentebe wa UTODA mu Kampala, Hajji Musa Katongole yagumizza baddereeva nti akulira KCCA, Jennifer Musisi yabayise era baliko enteeseganya ze balimu ezigenda okutuusa enjuyi zombi ku nzikiriziganya.