Abamu ku basuubuzi Bannayuganda abaayimbuddwa
Bya ROBERT MUTEBI
KKOOTI mu kibuga Juba ekya Sudan eyimbudde Bannayuganda 63 abaali bakwatiddwa mu kwekalakaasa olwa munnaabwe eyattibwa wiiki bbiri emabega.
Wiiki ewedde, abasuubuzi 63 mu kabuga Milika mu Juba baakwatibwa poliisi bwe baali beekalakaasizza ku nguudo nga bavumirira eky’Abasudani okutta omusuubuzi Munnayuganda Jacob Kasagga gwe baakuba amasasi bwe yali aggulawo edduuka lye.
Abasuubuzi bano bonna baali bakolera mu katale ka Kisekka ne bagenda e Juba okuyiiyiza eyo era nga bamazeeyo ebbanga erisoba mu mwaka.
“Amawulire gaatuyamba nnyo era abaana bonna baabayimbudde oluvannyuma lw’okusasulayo ddoola za Sudan 600 era bazzeeyo ku mirimu gyabwe kati bakakkalabya,” Edward Kakoba omu ku Bannayuganda abakolera e Sudan bwe yategeezezza.
Minisita w’ebyobusuubuzi, Amelia Kyambadde yategeezezza nga gavumenti ya Uganda bw’etandise enteeseganya ne Sudan ku ngeri Bannayuganda abakolera mu Sudan gye balina okuyisibwa.