Abamu ku baatikkiddwa.

ABAYIZI abaayitira  waggulu ebigezo bya PLE mu ssomero lya Cecilia and Paul Learning  Centre e Namuwongo  baweereddwa sikaala ne bbasale okuva eri Lawrence Mukiibi nnannyini masomero ne yunivasite ya St. Lawrence.

Abayizi bano nga babadde balabirirwa kibiina kya ‘Meeting Point Kyamusa Obwongo’ era nga ky’ekiddukanya  essomero lino  abasinga babadde tebalina bakadde baabwe ate  ng’abalala tebeesobola mu by’ensimbi era nga be baasoose okutuula ebigezo bya PLE mu ssomero lino.

Bino Mukiibi  yabyogeredde ku  kitebe ky’ekibiina kino era okuli n’essomero lino e Namuwongo  wiiki ewedde   bwe yeetabye ku mukolo abayizi 181 mu ttendekero ly’ebyemikono mu kibiina kino ekya Meeting Point,   kwe baaweereddwa amabaluwa  oluvannyuma lw’okumaliriza emisomo ku kutunga engatto, okutunga ebyalaani, okukola enviiri  n’ebirala.