Bya Henry Sssennyondo

ABASAJJA bana bakwatiddwa poliisi y'e Katwe n'ebaggalira nga kigambibwa nti babbye eby'amaguzi by'abasuubuzi ebyaleeteddwa mu konteyina okuva e China.

Abaakwatiddwa olw'okubba ebintu by'abasuubuzi kuliko: Ivan Bukenya, Amiss Bambika, Jackson Muwaayire ne Joseph Lule ng'abamu bakozi mu kifo we booleza emmotoka ekiyitibwa Jeremy Kar Wash okumpi n'essaawa ya Kkwiini mu Kampala.

Ekifo kino batikkulirawo eby'amaguzi bingi ebiva ebweru w'eggwanga.

Ebintu ebyabadde bibbiddwa okuva mu konteyina, mwabaddemu ebya Muky. Constance Nassali, Annet Kayongo ne Sylvia Namanda.

OC atwala poliisi y'e Katwe (ASP) Richard Kuteesa yategeezezza nti abasuubuzi bano beegatta ne bawa munnaabwe omu abasuubulire eby'amaguzi ne babipakira mu konteyina emu kyokka ne wabaawo obusente obugitambuza obwali busigaliddeyo ekyavaako okugikwata.