Pulezidenti Museveni

Bya Musasi Wa Bukedde

PULEZIDENTI Yoweri Museveni ategeezezza ng’okulwa mu bwapulezidenti bwe kimuyambye ennyo okusajjakula n’okufuuka kafulu mu by'obukulembeze.

Okwogera bino, Museveni yabadde Kisumu mu Kenya ku bugenyi obutongole gye yatongolezza ensawo eneeyamba ku bayizi abali mu matendekero aga waggulu mu mawanga ga Great Lakes emanyiddwa nga Great Lakes Universities’ Education Trust Fund. Omukolo guno gwetabiddwaako Ssaabaminisita wa Kenya, Raila Odinga ku Lwomukaaga.

Museveni yaakamala ku bwapulezidenti emyaka 26 okuva mu 1986 lwe yawamba oluvannyuma lw’olutalo olwakulungula emyaka etaano.

Museveni yagambye nti, “Abamu balowooza nti kibi okulwa mu bukulembeze, naye gy’okoma okulwamu, gy’okoma n’okuyiga. Nze kati ndi kafulu mu byobukulembeze.”

Museveni yawaddeyo doola z’Amerika 100,000 (eza Uganda obukadde 231) mu nsawo eyatongozeddwa n’agamba nti ebizibu bya Afrika ebisinga bivudde ku buteenyigira mu kunoonyereza kulungi ssaako n’amagezi amakyamu okuva ebweru.

Yasabye amatendekero ga yunivaasite okwewala amasomo agatali ku mulembe kuba ge gaviiriddeko abayizi abangi abafuluma ne babulwa emirimu.