Danes Wakyali ne John Sentumbwe abaakwatiddwa ne ttivvi enzibe e Kibira B.

Bya Vivian Nankya       

POLIISI e Namasuba  mu Kikajjo ekoze ekikwekweto mw’ekwatidde agavubuka abiri agabadde gatigomya abatuuze b’e Masajja  A  ne Kibira A n’egasuuza ebimu ku bintu bye gaabadde ganyaze.

Ekikwekweto kino kyakoleddwa mu kiro ekyakeesezza Mmande okuva ku ssaawa 10.00 ez’ekiro okutuuka ku 12.00 ez’oku makya.

Abaakwatiddwa ye  John Ssentubwe ne Dennis Wakyali kyokka bannaabwe babiri be baabadde nabo badduse.
Mu bye baakwatiddwa nabyo mulimu ttivvi ezisoba mu nnya, Hoofers, ebiwujja empewo,  leediyo  nga kigambibwa nti babadde bamenya amayumba g’abatuuze ne babinyaga.

Abatuuze olwawulidde ekikwekweto ne bazingiza abamu ku babbi babbi bano ne babakuba okutuusa poliisi lwe yabasanze n’ebabaggyako.

Waliwo n’omuvubuka omulala Isma Mbogo eyasangiddwa mu nnyumba etannamalirizibwa kuzimbibwa  ng’alina ebissi n’eggaali egambibwa okubbibwa   ku Roberto Busuulwa.

Poliisi yagguddewo emisango gy’obubbi egiri ku fayiro nnamba:SD:07/20/02/12 ne  SD:10/20/02/12.