Julius Ogwang owa Express (ku kkono) nga bumwefuka ne Joshua Kabale mu gwa liigi gye buvuddeko e Wankulukuku.

Bya BASASI BAFFE

Mu liigi:
Proline       1-0     Express
Police         0-1     KCC
Victors       1-1     Water
Mu Bell Uganda Cup:
St. Mary’s  0-1     URA
Boroboro  1-0     BIDCO
Maroons   3-1      Entebbe

Leero mu liigi:
SC Villa - Hoima Busia, Nakivubo

ABUBAKER Tabula, eyaliko emmunyeenye ya Cranes, eggulo yalaze nti akyalimu ssupu bwe yateebedde Proline ng’emegga  Express (1-0) e Nakivubo.

Omutendesi wa Proline, Abdallah Mubiru yategeezezza ng’obuwanguzi buno bwe buwadde abazannyi be amaanyi okuva mu kiyongobero ky’okuwuttulwa Bunnamwaya (3-0) wiiki ewedde.

E Namboole, aba KCC balula oluvannyuma lw’okusimattuka Police (gye baakubye 1-0). Joseph Ocaya ye yateebedde KCC peneti wabula balina okwebaza ennyo omukwasi waabwe Godfrey Wakabu bakira abataasa ku nnumba za Police ez’omujjirano.

E Kakindu, Victors ne Water benkanyizza evvumbe (1-1).
Ate mu Bell Uganda Cup, ggoolo ya Ali Feni ye yatakkuluzza URA FC ku St. Mary’s, eyabadde egifuukidde olukokobe.