KampalaBya Angel Lubowa ne Ahmed Mukiibi
YIINO endagaano kkampuni ya bbaasi eya Pioneer Easy Bus gy’erina n’ekitongole kya KCCA .
Endagaano eno eraga nti aba bbaasi bajjanga kusasuza abasaabaze ssente ezitasukka 500/- ku lugendo olutasussa kiromita 10ate ne siringi 1000 ku lugendo olususa kiromita 10 .
Kino kitegeeza nti okuva e Kampala okutuuka e Bweyogerere, oba okuva e Kampala okutuuka e Kasubi, Natete, Busega, bbaasi yaakusasuzanga 500/- zokka ate e Seeta, Mukono , Kyengera, Bulenga basasule 1,000/-.
Abakungu okuli Yinginiya wa KCCA Edward Mukalazi, Godfrey Wandera owa Minisitule y’ebyentambula, Fred Ssenoga akulira kkampuni ya bbaasi, David Bayingana naye owa bbaasi ne bannaabwe abalala basatu Nyandaza Rumbidzayi, Emmanuel Walwasa ne Easter. K.Tayebwa be baagitaddeko emikono mu April , 2010.
Ebiri mu ndagaano gye baakola ne KCCA
1 Kkampuni ya Pioneer ejja kuleeta bbaasi 522 ezigenda okukola ku Western zooni; (Kibuye -Ndeeba -Nateete, Kyengera Bulunga, Nakulabye, Kasubi, Nansana ) ne Eastern zooni (Nakawa, Kireka, Bweyogerere, Bukoto Ntinda, Bugoloobi, Mutungo, ne Luzira). Eastern Zone yaakukolako bbaasi 305. Ate Western bbaasi 217
2 Aba bbaasi bateekwa okusasuza abantu ebisale ebigwanidde ng’olugendo olusooka olutasussa kiromita 10 omusaabaze asasula 500/- zokka ate olusussaamu ateekeddwa kuwa 1000/-
3 Buli bbaasi eteekwa okusasula KCCA emitwalo 30 buli mwezi okukolera mu Kampala.
4 Kkampuni ya bbaasi terina kulemsa takisi naddala ebbali mu byalo kubanga zirina okutuusa abantu mu bifo omunaabeera bbaasi n’okubongerayo gye zitatuuka. Bwekityo aba bbaasi tebalina kusasuza ba takisi olw’emirimu gyabwe okuleka obubaggyako ssente z’okuddukanya ebifo (Terminal) bbaasi we zisimba bwe babeera nabo babikozesezzaako.
5 Kkampuni ya bbaasi yabaliriddwa okukozesa wakiri abakozi 3,000 abateekeddwa okuweebwa emirimu olw’obusobozi bwabwe so si mwana waani.
6 Aba kkampuni ya bbaasi bateekwa okuzimba siteegi okussaako obuyumba abantu mwe bazirindira kisikirize abantu okuzirinnya.
7 KCCA kiteekwa okumanya kalonda yenna agenda mu maaso mu kkampuni ya bbaasi.
8 Kkampuni ya bbaasi yali eteekeddwa okutandika okukola oluvannyuma lw’emyezi ena gyokka ng’endagaano eteekeddwako emikono waakiri ne bbaasi 100 ate oluvannyuma lw’emyezi mwenda zonna zireetebwe.
9 KCCA eteekeddwa okwetegereza endagaano eno oluvannyuma lw’omwaka erabe ebintu bwe bitambudde n’oluvannyuma bw’ebeera ematiza ebongezeeyo.
10 KCCA eteekwa okusasuza aba bbaasi ebifo we bagenda okusimba mmotoka zaabwe. Mu mbeera ng’ebifo ebimu omubadde musimbibwa mmotoka ne zisasula Multiplex biweereddwa bbaasi, ziteekwa okusasula ssente zennyini ezandivuddemu.
11 Bbaasi ziteekwa okutuuza abantu waakiri 60 buli emu.
12 Tewali wa bbaasi akkirizibwa kumala gongeza bisale era minisitule y’ebyentambula eteekwa okuteekawo amateeka n’obukwakkulizo okulungamya aba bbaasi.
12 Kontulakiti eno ejja kumala omwaka gumu n’oluvannyuma wabeewo okugyekenneenya era singa kinaazuulibwa nti aba pioneer bamatizza omulimu , bajja kwongerwa emyaka emirala etaano. Singa kinaazuulibwa nti omulimu gubalemye, kontulakitia ng’esazibwamu.