Bya JOSEPH MUTEBI

ABASAMIZE abafera abantu baakiguddeko. Akulira abasawo b’ekinnansi mu ggwanga, Sylvia Namutebi  (Maama Fiina) ne poliisi y’e Nateete bwe baakoze ekikwekweto ne bayoola abamu ku bo okuli n’omusajja abakazi  gwe balumiriza okubakozesa nga bagenzeeyo okubasawula.

Ekikwekweto kino kiddiridde poliisi y’e Nateete okutuukirira Maama Fiina ne bamusaba ajje ayambe abantu okubasunsuliramu abasawo abafere.

Abakyala  okuva e Nalukolongo, Nateete ne Busega beemulugunya ku basamize ababakwata olw’empaka 

nga bagenze mu masabo gaabwe okubasawula ng’ate balina ebizibu tebayinza kwewala masabo.

Omu ku baakwatiddwa Ntanio Gita essabo lye yalizimba ku mwala gw’e Nalukolongo omunene waggulu era ng’okutuukayo omala kuguyitako ku kitindo ky’embaawo kye yateekawo.

Yasangiddwa n’amagumba abiri mu ssabo lye, Maama Fiina ge yagambye nti bagenda kugatwala e Wandegeya bagakebere kubanga gateeberezebwa okuba ag’abantu.

Gita yakkirizza nti abadde 

akozesa essabo lye ng’akama-su okufuna by’ayagala era abantu abamu bagamba nti engeri gye yazimbamu essabo lino alabika yagenderera kwagala kusobya ku bakazi.

Abalala abaakwatiddwa baasangiddwa mu kitoogo ky’e Busega nga bafuuwa mmindi era baagezezzaako okudduka kyokka poliisi ne basajja ba Maama Fiina ne bakwatako omukazi Sylvia Nalwanga ne Muhammed Kigozi.  Omulala yadduse. 

Nalwanga yategeezezza nti yabadde agenze kufuuwa ku mmindi mu ssabo erisangibwa mu kitoogo okutereeza amakage.

Ate Kigozi  yategeezezza  nti  ye yabadde agenze kulaba ku banywanyi be wabula ye ssi musawo.

Maama Fiina yagambye nti ebikwekweto bikyagenda mu maaso era ne gye buvuddeko yagulidde  omumyuka we Nsubuga Mayanja  mmotoka okukola ku bikwekweto bino.

Abakwate bagguddwaako omusango gw’okweyita kye batali ku fayiro  nnamba SD/53/07/07/2012. Wabula Nalwanga, Maama Fiina yamusonyiye abalala ne baggalirwa.