Bya ANGEL LUBOWA
ABOOLUGANDA lw’omuvuzi wa sipensulo e Mengo ku ddwaaliro ne bakozi banne bali mu kutya olwa munnaabwe eyaggyiddwa ku siteegi n’emmotoka ye ey’ekika kya Noah ku Lwokusatu n’ataddamu kulabika ng’alowoozebwa nti yattiddwa.
Peter Badokwaya, 47, omutuuze w’e Busega okumpi n’ekkolero lya Samona ery’ebizigo omusajja yamupangisa ng’amugambye nti bagenda kunona mulwadde kyokka n’ataddamu kulabika.
Akulira siteegi eno, Patrick Yiga yategeezezza nti wayiseewo ennaku mukaaga nga munnaabwe abuuziddwaawo n’emmotoka ye ate nga n’essimu zaggyibwako mu ddakiika 40 ezaddirira ng’avudde ku siteegi. Kino kitandise okubatiisa nti baandiba ng’abaamupangisa bazigu abatta n’okubba mmotoka.
Yannyonnyodde nti ku Lwokusatu ssaawa nga musanvu, omusajja eyali ataddeko enkoofiira y’ajja ku siteegi yaabwe ne yeetegereza mmotoka zonna ezaaliwo oluvannyuma n’asiimako Noah ya Badokwaya nnamba UAP 061 D ne bateesaganya.
“Munnaffe yasangibwa atumizza emmere y’ekyemisana kwe kulagira munne agirye kubanga yali amaze okugisasula n’atugamba nti akomawo kyokka teyakomawo kati ennaku mukaaga. Twamukubirako nga wayiseewo eddakiika 40 ng’asimbudde twogeremu kyokka ng’essimu evuddeko ne tutasooka kukitwala ng’ensonga,” mukwano gwe Fred Mawejje bwe yategeezezza.
Yayongeddeko nti oluvannyuma lw’olunaku okuziba nga takomyewo, enkeera ne mukazi we yabatuukirira naye ng’amunoonya kubanga teyadda ka ne bamubuulira ebyabaddewo.
Bagguddewo fayiro y’okubulawo ku SD:02/12/07/2012 [CPS ne SD: F80/11/07/2012 ku poliisi y’e Nateete ne CPS.
Omulambo baagutemyeko emikono
Ddereeva ono yasangiddwa ng’attiddwa abatemu abaamukubye ennyondo mu kyenyi ne bamufumita ekiso ku nsingo ne kigukira mu kifuba, ne bamwongera ekiso mu lubuto n’oluvannyuma ne bamutemako emikono gyombi.
Omulambo gwa Peter Badokwaya abadde amanyiddwa nga Pepe ng’akolera ku siteegi ya sipensulo ku ddwaaliro e Mengo abazigu baagusudde mu kabira akayitibwa Mutwe ku kyalo Lukwanga okumpi ne Ssentema mu Ggombolola y’e Wakiso.
Baalese bagwambuddemu essaati nga guli mu mpale n’omusipi era abatuuze baasanze gutandise okuvunda nga kiteeberezebwa nti baagusuulawo ku Lwokusatu lwennyini lwe bamuggya ku siteegi emisana.
Omugenzi abadde abeera Busega Central Zooni C okuliraana essomero lya King Fahad gy’abadde n’amaka. Y’omu ku bazzukulu b’omugenzi Rev. Can. Yacob Badokwaya eyaweereza ennyo mu Bulabirzi bw’e Namirembe era ennyumba ye eriraanye n’amalaalo ge agazimbibwa mu ngeri ey’omulembe.
Omugenzi ono abadde aweza emyaka 47, oluusi avuga bbaasi ez’ekibaluwa.
Omu ku b’ebyokwerinda abaasoose ku mulambo yategeezezza nti baayitiddwa essimu eyabakubiddwa omutuuze nga baakasanga omulambo gwa Badokwaya ogwazuuliddwa obwana obwabadde bututte ente ku ttale.
“Abaana beekanze ekintu ekikwatiridde ensowera kye baasoose okulowooza nti kisolo kyokka ng’ate balabako ng’omusipi kwe kuddayo ne bategeeza jjajjaabwe,” bw’atyo Bukenya bwe yategeezezza.
Yagambye nti bwe batuuse ku mulambo ne poliisi baagusanzeeko ebiwundu eby’ekiso ekiwanvu ekyamufumitiddwa ku nsingo ne kiggukira mu bulago, ekiwundu ky’ekiso ekirala mu lubuto n’ekiwundu ky’ennyondo eyamukubwa mu kyenyi n’emusesebbula ennyindo.
Emikono gyombi nagyo gyabadde gitemeddwako waggulu w’ekiseke era tebagisanzeewo. Poliisi yabadde tennamanya oba abaamusse baagenze nagyo ne bagisuula awalala oba okugitwala mu balaguzi okweganga.
Omugenzi abadde avuga mmotoka Noah nnamba UAP -061D erowoozebwa nti abaamusse gye baabadde baagala kyokka ne bakozesa akakodyo k’okwefuula abazze okumupangisa abanonere omulwadde bamuleete mu ddwaaliro.
Omutuuze w’e Lukwanga, John Musisi yategeezezza nti ku Lwokusatu ssaawa nga 8.00 ez’emisana emmotoka y’obuyonjo entono gye beefaanaanyiriza okubeera Golf oba Starlet eri mu langi eya bbulu ng’ebayitako n’ekkirira okumpi n’awazuuliddwa omulambo kyokka ne batakitwala ng’ekikulu.
Yanyonnyodde nti oluvannyuma lw’emmotoka okubayitako yayimiramu ne muvaamu omusajja omutono nga muwanvu ng’ayambadde essuuti enzirugavu ng’ataddeko ne ggalubindi z’omusana n’akomawo we baali n’abanyumiikiriza kyokka ng’agira n’abaako b’ayogeraganya nabo ku ssimu.
Poliisi erowooza nti mmotoka eno mwe mwali omulambo gwa Badokwaya ng’omusajja ono yali abuzaabuza batuuze baleme kufaayo ku kiki mmotoka kye yali ekola okuliraana akasaka.
Musisi yategeezezza nti oluvannyuma lw’akaseera mmotoka yakomawo era omusajja n’abasiibula n’alinnya n’agenda.
Kyokka waliwo omutuuze eyategeezezza nti ekifo we baagusanze kitera nnyo okusuulibwamu abantu abattiddwa.