Bya HENRY KASOMOKO
ABACONGO ababadde bagumbye ku ofiisi z’ekitongole ky’abanoonyi b’obubudamu, bavudde mu mbeera ne beeyambula nga bagamba nti tebafiiriddwako wadde okuweebwa obuyambi bwonna ebbanga lye bamaze mu kifo kino.
Bagamba nti wiiki ssatu zebamaze mu kifo kino tebafiiriddwako wadde okuweebwa emmere kuba gye baggya nayo ebaweddeko ate ng’ewaabwe wakyaliyo olutalo.
Poliisi yayitiddwa ne bagezaako okubawooya kyokka ne bagaana. Abakazi abaabadde beesibye buleesu baatandise okubwesumulula okukkakana nga basigadde bukunya.
Oluvannyuma baawaliriziddwa okulinya mmotoka eyabatutte mu disitulikiti y’e Mubende eri ekifo gye bagenda okubeera , okutuusa eggwanga lyaabwe bwe linaatereera balyoke baddayo.