Palamenti ekakasizza Ssekandi ne Mbabazi

Ssekandi 68, yakakasiddwa ku kifo ky’omumyuka wa Pulezidenti mu lutuula olwakubiriziddwa  Sipiika Rebecca Kadaga nga ku babaka 245 abeetabye mu lutuula lw’eggulo, 244 baamusembye okuggyako omu yekka eyagaanyi okulaga oludda.

Mu lutuula lwe lumu, John Patrick Amama Mbabazi, 62 naye yakakasiddwa ku bwa Katikkiro wa Uganda wadde nga waabaddewo ababaka  abaagezezzaako okumusimbira ekkuuli bwe battukiza eby’ensimbi ezaabulankanyizibwa mu kutegeka olukung’aana lwa CHOGM, ne ssente ezisukka mu buwumbi 11 aba NSSF ze baamuwa mu ttaka ly’olutobazzi e Temangalo mu Wakiso.

Mbabazi yakubiddwaako akalulu , ababaka 225 ne bamusemba, kyokka 18  ne bawakanya okulondebwa kwe ate abalala  bana ne batabaako ludda.

Kati Mbabazi ne Sekandi babuzaayo kukuba birayiro mu maaso ga Pulezidenti Museveni, Ssaabalamuzi wa Uganda n’akulira abakozi ba Gavumenti olwo bayingire ofiisi zaabwe mu butongole baweebwe n’ebigenderako ng’abakuumi n’emisaala emisava.

Ssekandi ne Mbabazi baalondeddwa Pulezidenti Museveni  nga yeeyambisa obuyinza obumuweebwa mu Konsitityusoni era ebbaluwa kwe yabalondedde  yaziweerezza  Sipiika wa Palamenti Rebecca Kadaga nga May 23, 2011 ng’asaba Palamenti ebakakase.

Ekiteeso ekisaba Palamenti okukakasa Ssekandi ku bumyuka bwa Pulezidenti kyayanjiddwa Mike Mukulu (Soroti Munisupaali-NRM) ne kisembebwa  Rebecca Amuge Otengo (Mukazi Alebtong-NRM).

Ababaka bonna baawagidde Ssekandi kyokka Latif Sebaggala (Kawempe North-DP) yalaze okutya nti  emisango gy’okulonda Ssekandi gy’awerennemba nagyo  mu kkooti e Masaka bwe ginaamusinga ennamusa eyinza okudda ku nnyooge wabula banne baamukubye olube era bwe gwatuuse ku kukuba akalulu y’omu ku baasoose okuwanika nti Ssekandi agwaanidde ekifo.

Ababaka  bonna bassizza kimu nti Ssekandi si muli wanguzi, talina bbala lyonna, akwata mpola ensonga ze takulembeza mawanga na ddiini era nti bwe gutuuka ku by’amateeka, obwongo bumwesera.

Abooludda oluvuganya gavumenti baasabye Ssekandi okweyambisa obwogi bw’obwongo bwe mu by’amateeka okuwabula Pulezidenti Museveni ne gavumenti ya NRM okubavvoola n’okuyisa olugaayu mu Konsitityusoni naddala  ku nteekateeka ey’okukyusa mu Konsitityusoni okugaana abeekalakaasi okweyimirirwa.

Ekiteeso eky’okukakasa Mbabazi ku bwa Katikkiro kyaleeteddwa Adolf Mwesige (Bunyangabu-NRM) ne kisembebwa Justine Kasule (Mukazi-Bugiri-NRM) wabula ababaka ab’oludda oluvuganya baamusimbidde ekkuuli nga bagamba nti tasaanidde kutuula mu ofiisi nnene bwetyo ng’aliko enziro ku by’ensimbi za CHOGM ne Temangalo.

“Amama Mbabazi, si mwesimbu, tasembererwa, wa mampaati era n’amalala gaamuyinga”, Ken Lukyamuzi (Lubaga South-CP) bwe yamwesimbyemu wakati mu kung’oolebwa abamu ku babaka ba NRM.

Yawagiddwa Issah Kikungwe (Kyaddondo South-DP) eyagambye nti Konsitityusoni tekkiriza muntu nga Mbabazi kulya gufo ogwo kyokka Sipiika Kadaga yabakubye ku nsobolotto nti ensonga ze bawanuuza tebaziriinako bukakafu.

Ababaka abaawagidde Mbabazi baagambye nti alina obumanyirivu era muwulize eri Pulezidenti Museveni ne bategeeza nti Mbabazi alina ekitiibwa n’obuyinza.