Eddiiro lya Gaddafi lisesebuddwa

Olubiri lwa Col Gaddafi  lwalabiddwa nga lutuntumukka omuliro n’okuvaamu erikka kyokka ng’ebimotoka bya poliisi ebizikiriza omuliro bifuba okuguzikiza.

Amayitire ga Gaddafi gaabadde teganamanyibwa eggulo kyokka ensonda mu byokwerinda kwa Libya zaategeezezza nti mu kiseera ennyonyi  we zaakubidde olubiri  luno olw’e  Bab al-Azizya olusangibwa mu kibuga Tripoli ng’ayolekedde ekisaawe ky’ennyonyi  eky’e Tripoli  kyokka nga tekimanyiddwa wag ye yabadde agenda.

Guno gwe mulundi  ogwokuna ng’ennyonyi zikuba olubiri luno. Ogwasooka  gwaliwo mu 1986, ne ziddamu mu March w’omwaka guno gattako  mu kiro ekyakeesezza Paasika n’ekyakeesezza Easter Mmande.

Ebitongole by’amawulire  byategeezezza nti  bbomu ezaakozeseddwa ku luno zibadde tezinawulirwa mu Tripoli olw’amaanyi  gaazo  agakankanyizza n’ebizimbe. n’okutataaganya ebyempuliziganya era tivvi ne leediyo zaavuddeko okumala eddakiia 35.

Ate zo ennyonyi za Amerika enkessi eza ‘drones’ kyokka nga ziwangiddwaako n’emizinga zaasaanyizaawo emmundu ya Gaddafi gy’abadde yeesiga ennyo eyitibwa  SA-8 Gecko.

Ekimu ku bizimbe ebyakubidwa mwe mubadde  ekisenge omusomerwa ebitabo n’ekisenge omuteesezebwa era nga Gaddafi mwe yasisinkanira  Pulezidenti Jacob Zuma owa South Afrika n’abakungu ba AU abalala gye buvuddeko nga bagenze okulaba engeri gye bayinza okutabaganamu n’abayeekera.

Kyokka omwogezi wa gavumenti ya Libya, Mussa Ibrahim yagambye nti Gaddafi gy’ali mulamu wadde ng’aba NATO babadde bagezaako okumutemula.

Ekizimbe kino abawagizi ba Gaddafi buli kiro babadde bakung’aanirako waggulu okutangira ennyonyi za NATO okukisesembula nga kwe bali.

 E MISRATA BALWANA

Amagye ga Gaddafi agabadde gagumaazizza abayeekera  nti gayimirizza ku byokulwana  mu kibuga ky’e Misrata gaasitudde buto enkundi okuva ku Paasika ne gaddamu okugwisa obwenyi n’abayeekera mu lutalo olwafiiridde abantu absoba mu 23.

Amagye ga Gaddafi  gaagudde ekifuyiifu ku bayeekera abaabadde bajaganya olw’okuwamba ekizimbe ekisinga obuwanvu ne babattamu abawera. Kyokka n’abayeekera engabo bagirumizza mannyo nga kati beetoolodde basajja ba Gaddafi ebweru w’ekibuga nga tebakyalina we bayisa mmere, ddagala oba okutwala bannaabwe ababa balumiziddwa mu amalwaliro n’okufuna ebyeyambisibwa mu mmundu zaabwe.

Bbo abayeekera bakyefuze omwalo gw’e Misrata era nga kino kye kimu ku kikyabafudde abazibu okulinnya kunfeete kuba bayingirizaako ebyokulwanyisa n’okutwala abalwadde baabwe e Benghazi okujjanjabwa.

Omu ku bajaasi ba Col Gaddafi  eyawambiddwa  Ali Misbah  yategeezezza abamawulire  nti   bangi ku bajaasi ba gavumenti e Misrata amaanyi gabawedde  era baagala okuwanika kyokka batya  nti abayeekera bajja kubatungumbula.
    
ABAYEEKERA  BAGUDDE MU KAVU

Bibadde bikyali bityo ate abayeekera Col Gaddafi  ne bagwa mu kavu  gavumenti ya Kuwait bwe bawadde omusimbi bongere okwetereeza.

Kuwait yalangiridde ku lunaku lwa Paasika nti abayeekera  ebawadde Ddoola obukadde 180  (ze za Uganda obuwumbi nga 430) zibayambe mu kugula ebyokulwanyisa.

We bafunidde ssente zino nga n’amawanga nga Qatar nago gaatandika dda okubayamba mu ssente n’ebintu ebirala era ga babatongozza dda ng’abafuzi ba Libya abatuufu.

‘GADDAFI  ABULAMU ENKUBA EZ’OMUTAWAANA’

Abakakiiko k’ebyokwerinda   ku lukiiko lwa Senate mu Amerika bategeezezza nti NATO Gaddafi ekyamukubya kisa nti bwe gutaba gutyo singa gamuggwa dda.

Baagambye nti Gaddafi  yeetaaga okukuba bbomu ez’okumukumu ne basajja be nga buli lw’azuukuka yeewunya kiki kiddako atuuke n’okwebuuza ng’enkoko y’omutamiivu nti “ekiro kya leero nkeesa?”

Omukiise Sen Lindsey Graham yasinzidde mu kibuga  Washington ku Paasika ne banne babiri bwe batuula ku lukiiko lwa Senate nga bonna ba mmemba bakibiina ekivuganya ekya Republican ne bagamba nti Gaddafi tagwana kukwasa kisa.

EBIKWATA KU MMUNDU SA-8 GECKO

EMMUNDU ya Gaddafi eyasaanyizzzaawo mu lulumba olwakoleddwa NATO mu kiro ekyakeesezza eggulo eyitibwa SA-8 Gecko nga nkola y’Abarussia.

Emmundu  eno omulimu gwayo omukulu kukuba nnyonyi era ng’erkiko n’ebyuma ebiketta ennyonyi ng’ekyali walako n’etunuza emizinga gyayo ku ludda ennyonyi eno gy’eva.

Ebyembi eri Gaddafi, ennyonyi z’abomukago za tekinologiya wa waggulu nga zirina obuuma obuzaabuza emmundu ezikuba ennyonyi nga tezisobola kumanyiira ddala ludda we zigenda kufubutukira oluusi n’obutaziwulira.

Kyokka esobola bulungi okukuba ennyonyi za nnamunkanga era gye buvuddeko amagye ga Gaddafi bwe gaakubye nnamunkanga z’abayeekera zaakozesezza mmundu eno.

Mu mawanga ga Afrika agalina ekyokulwanyisa kino ng’oggyeeko Libya mulimu South Afrika ne Algeria zokka.

Esobola okukuba ennyonyi eri mu kiromita 35 ate ng’omuzinga oguggyisibwako guzitowa kkiro 126 nga guwenyuka emisinde gya kilomita 80 buli ssaawa.