Mmotoka ekika kya Noah abazigu mwe babadde batambulira. Babadde balumbye essundiro ly'amafuta erya City Oil e Kamwokya. EBIFAANANYI BYA HENRY KASOMOKO
BYA Ashraf S. Kasirye ne Henry Kasomoko
Poliisi ewanyisiganyizza amasasi n'abazigu ababadde baluse olukwe okubba ensimbi ku ssundiro ly'amafuta erya City Oil e Kamwokya.
Omwogezi wa polisi mu Kampala n'emiraano, Emirian Kayima, ategeezezza nti Poliisi ya Flying Squad yagudde mu lukwe lw'abazigu bano ababadde batambulira mu mmotoka ekika kya Noah, nnamba UAJ 586Q n'ebalondoola okutuuka ku ssundiro ly'amafuta kyokka bw'egezezzaako okubakwata ne baggyayo emmundu ne bawanyisiganya amasasi era mu kavuvung'ano ne gakuba abantu ne baddusibwa mu ddwaaliro nga bataawa.
Kayima ategeezezza nti omukozi w'essundiro lino ategeerekeseeko erya Lumanyika y'omu ku baddusiddwa mu ddwaaliro lya Case Clinic ku Buganda Road ng'ali mu mbeera mbi kuba essasi limukubiddwa mu lubuto.
Omuserikale wa Flying Squad naye akubiddwa essasi wamu n'omubbi, Tony Nnume ng'ono essasi limukutte mu kugulu.
Kayima agambye nti bakutte abantu 6 abateeberezebwa okuba ababbi wamu n'emmundu emu, n'ayongerako nti bakyekebejja emmotoka ababbi gye babadde batambulira ng'eno ababbi baagikuddeko nnamba puleeti y'omu maaso n'emabega.
Omukuumi ayogedde
Omu ku bakuumi b'essundiro lino, Charles Osieli agambye nti ababbi bano baamulumba dda ne bamubagulizaako nti bagenda kuggya babbe ku ssundiro lya City Oil era ne bamusaba akolagane nabo n'abawuddiisa n'akkirizza kyokka ensonga n'azitegeeza ku bakamaabe nabo ne babaguliza ku Poliisi ya Flying era obwedda ebalinnya akagere.
