TOP
  • Home
  • Ag’eggwanga
  • Ddereeva wa Bobi Wine yaziikiddwa mu biwoobe n'okwazirana: Alese bannamwandu 5

Ddereeva wa Bobi Wine yaziikiddwa mu biwoobe n'okwazirana: Alese bannamwandu 5

Added 16th August 2018

DDEREEVA wa Bobi Wine eyakubiddwa amasasi mu kalulu ka Munisipaali y’e Arua yaziikiddwa eggulo wakati mu kwaziirana n’emiranga.

Emikolo gyabadde ku kyalo Ssango mu ggombolola y’e Buwama mu disitulikiti y’e Mpigi. Okuziika kwetabiddwaako okusinga bannabyabufuzi.

Bano baakulembeddwamu famire y’omubaka wa Kyaddondo East, Robert Kyagulanyi n’abayimbi abeegwanyiza okuyingira ebyobufuzi..

Ku bano kwabaddeko Ronald Mayinja, Dr. Hilderman (Hillary Kiyaga) n’abalala.

Amyuka Bobi Wine mu nsi ya ‘Ghetto’ Nubian Lee yennyamidde olw’engeri ddereeva wa mukamaawe gye yattiddwa kyokka n’abasaba baleme kumukaabira kuba yabadde alwanirira ddembe lya Bannayuganda.

Omubaka Asuman Basalirwa eyaakawangula akalulu k’e Bugiri ng’ayambibwako Bobi Wine yawakanyizza ebyogerwa Poliisi nti emmundu eyakubye essasi ya ba opozisoni n’agamba nti buno bulimba kuba gavumenti emanyi ekituufu era bonna abaakikoze yabasabidde dduwa enkambwe.

Mukulu wa Bobi Wine ‘Chairman’ Fred Nyanzi yabuulidde abazze okuziika ebyabaddewo mu Arua ng’abaserikale babalumba n’awakanya ebigambibwa nti bbo be baalumbye ‘Konvoyi’ ya Pulezidenti.

Yagambye nti ye ye yasimattuse okuttibwa kuba ddereeva Kawuma gwe yabadde alinze basimbule naye Kasiano Wadri n’amuyita babeeko ka ‘meetingi’ mwe batuula kozzi awona, era olwazze emabega amasasi ne gavuga agasse ddereeva Kawuma.

ALESE BANNAMWANDU 5

Yasin Kawuma (40) baagenze okumutemula ng’alina abakyala abamanyiddwa bataano n’abaana 12 abamanyiddwa era bano balekeddwa ttayo. Ku bano kuliko n’ow’emyezi ena gyokka!

Amasasi baagamukuba ku Mmande akawungeezi ku ssaawa nga 12:00 okumpi ne Royale Hotel mu kibuga Arua.

Yabadde mu mmtooka y’omubaka wa Kyaddondo East, Robert Kyagulanyi amanyiddwa nga Bobi Wine, ekika kya Toyota Tundra ng’asimbye mu luggya.

Bakazi ba Kawuma be yalese okuli Alice Mwesigwa gw’alinamu abaana basatu ( abadde yanoba), Annette Nansubuga abadde mu maka g’e Lusanja -Kiteezi mu ggombolola y’e Kasangati mu disitulikiti y’e Wakiso, omulala ye Beatrice Nakigudde gw’alinamu omwana omu, Jennipher Nakibuule n’abalala baasobeddwa eka ne mu kibira nga tebamanyi kyakukola.

Okusinziira ku muyimbi Spark Ssebabi muganda wa Kawuma, omwana omukulu wa myaka 20 ate asembayo obuto, alina emyezi ena.

Tonny Sempebwa meeya wa Kassanda Town Council yagambye nti omugenzi abadde akoledde nnyo ekitundu kya Town council y’e Kasangati n’abasaba bakulembeze banne ttenda ezibadde mu mannya ga Kawuma zisigalewo ssente ezibadde zivaamu zigende mu maaso n’okulabirira abaana ne bannamwandu.

Awakanyizza ebigambibwa nti Bobi Wine ye yavuddeko Kawuma okufa n’agamba nti zino zaabadde ntuuko.

More From The Author

Emboozi z’omuwandiisi endala

Emboozi endala

Minisita Nabakooba

Abawala b'amassomero abafu...

OMUWENDO gw’abaana abato abafuna embuto mu kiseera ky’omuggalo gw’okwerinda obulwadde bwa ssenyiga gweyongedde...

Wakiso Giants esudde 2

WAKISO GIANTS FC mu liigi ya babinywera esazizzaamu endagaano z’abasambi babiri ezibadde zibuzaako emyaka ebiri...

Janet Museveni asimbudde tt...

MINISITA w’ebyenjigiriza n’emizannyo Janet Museveni asibiridde entanda ttiimu y’eggwanga ey’abaddusi bw'abade agisimbula...

Abakulembeze baloopedde Kis...

ABATUUZE mu Kisenyi n’abasuubuzi abatundira ebyamaguzi ku nguudo balaajanidde dayirekita wa Kampala omuggya Dorothy...

Amasannyalaze gakubye babir...

Entiisa yabuutikidde abatuuze ku kyalo Wantoni mu Mukono Central division, Mukono munisipaali, abasajja babiri...