Butandu efeeriiremu ba kansara 2- Ntungamo.

N’ebya Rwambuka Mugisha

NTUNGAMO

Pooriisi omu disiturikiti eya Ntungamo eriyo necondooza ekirugiriireho butandu efeeriiremu ba kansara ba disiturikiti 2 omuri Ntungamo.

Butandu egi ebaire ahari Katinda aha ruguuto orwa Ntungamo kuza Kabale Orw’okubanza shaaha nka 9 z’eihangwe.

Omuduumizi wa Pooriisi ya Ntungamo, Bushaija Hannington naagamba abagyenzi nka: Monic Kutamba Rutabingwa (orikujwekyera egomborora eya Ngoma) hamwe na Pius Nuwagaba Tusiimire (Ow’egomborora eya Nyarutuntu).

Bushaija naagira ngu ba kansara abafiire babaire nibatamburira omu motoka ya Toyota wish ehandikirwe omu namba ya UBH 873G barikuza Rubaare. 

Beitu ku babaire nibaza kuhika omu ka tauni ka Kabagyenda aha ruguuto orwa Kabale- Mbarara nikwo emotoka yaabo kutaahira omu motoka ya Isuzu Canter truck eya namba UBD 660V. 

Emotoka etungire butandu aharuguuto orwa Ntungamo kuza Kabale ahi ba kansara bafeeriirwe amagara gaabo Orw'okubanza.

Okurugiirira aha muduumizi wa Pooriisi, okuvuga siipidi hamwe n’enjura y’amaani nibyo biretsireho butandu egi.

Siipika wa disiturikiti eya Ntungamo, Nicholas Twikirize-Mugyenyi naagira ngu nka disiturikiti bakiri omu kahuuruko ahabw’okufeerwa ba kansara ababaire bari abakozi munonga.

Ceeyamaani wa disiturikiti eya Ntungamo, Samuel Muchunguzi-Rwakigooba naagira ngu tayine bigambo ahabw’okufeerwa ba kansara.

Nuwagaba, 33, abaire ari omuncuro ye y’okubanza nka kansara kandi na Kutamba Rutabingwa, 30, omukazi wa Rutabingwa, Omuhingi, nawe abaire ari aha kisanja kye ky’okubanza nka kansara omukazi ahabw’egomborora eya Ngoma.

Siipika Twikirize agizire ngu nka kanso nibaija kutaho kanso y’omutaano kubaasa kwinamira ba kansara abafiire n’okubasiima ahabw’emirimo ei bakozire.

#WestUpdates