Purezidenti Museveni ahaire Rev. Sr. Nayiga omudaari gwa Diamond ogwa ‘independence’.

N’ebya Omushaki weitu

ENTEBBE, KAMPALA

Purezidenti Yoweri Kaguta Museveni ahaire Rev. Sr. Maria Richard Nayiga omudaari gwa Diamond ogwa Uganda kujaguza emyaka 60 ei yayihisya kuruga etunga okwetegyeka. 

Omukoro ogu gubaire aha maka g’obwa Purezidenti, Entebbe nyomwebazyo 06/11/2023.

Omudaari ogu ogwa 60th Independence Diamond Jubilee medal guhairwe Rev. Sr. Nayiga kumusiima emirimo ei akoriire eihanga eri kuruga omu mwaka gwa 1962 kuhisya ebiro 09/10/2023.

Purezidenti Yoweri Museveni, omukazi we Janet Kataaha aha mukoro gw'okuheereza Rev. Sr. Maria Richard Nayiga omudaari gwa Diamond ogwa 'independence' y'omurundi gwa 60 ogubaire aha maka g'obwa Purezidenti, Entebbe.

Rev. Sr. Nayiga akaba aine kutunga omudaari ogu aha mikoro y’okujaguza ekiro kikuru ky’okwetegyeka kwa Uganda okw’omurundi gwa 60 eyabaire omu disiturikiti eya Kitgum ebiro 09/10/2023 beitu taraabaasize kubaho ahabw’enshonga zitari zimwe.

Aha mukoro ogwo, Purezidenti Museveni akasima Rev. Sr. Nayiga ahabw’omurimo muhango ogu akoriire Uganda. Purezidneti nabwo akaraganisa kumushagika.

Rev. Sr. Nayiga, akazaarwa ebiro 10/06/1939 omuri Kasenyi omu disiturikiti eya Mubende. 

Rev. Sr. Maria Richard Nayiga aha mukoro gw'okumuheereza omudaari gwa Diamond ogwa 'independence' y'ookwetegyeka kwa Uganda ey'omurundi gwa 60 ogubaire aha maka g'obwa Purezidenti, Entebbe aharw'okubanza ebiro 06/11/2023.

Ogu akatungisibwa obusisita omu mwaka gwa 1971 kadi akaija yahuumurira aha kereziya ya Gogonya.

Oihireho eby’ediini ahi yakozire omu Dayosiisi ya Kiyinda-Mityana, Nsambya, Rubaya na Gogonya, Rev. Sr. Nayiga akabaasa kukora ebintu bingi omu bantu omuri okuhayo ekicweka ky’eitaka rye eririkushangwa omu disiturikiti eya Kyankwanzi omu gomborora eya Mulagi omu kyaro kya Kigando kwombekaho eitendekyero ery’emikono ry’abeegi abatarikwebaasa kwongyerera aha murimo gwa Fr. Kasole.

Rev. Sr. Nayiga nabwo akakoresa esente ezi yarundaine kuruga omuri banywani be b’omu eihanga erya Germany kubaasa kukwatiraho abeegi baingi abatarikwebaasa omu matendekyero g’eby’obwegyese bw’ah’aiguru omuri n’abeebembezi b’ediini ahi abasisita barikurenga omuri 100 baganyirwemu n’abandi bingi.

Rev. Sr. Maria Richard Nayiga, minisita w'eby'amashanyarazi n'obugaiga bw'omu eitaka, Ruth Nankabirwa n'abandi aha maka g'obwa Purezidenti, Entebbe ahi Purezidenti Museveni aheeriire Rev. Sr. Nayiga omudaari gwa Diamond.

Omukoro gw’okumuheereza omudaari guhikirweho Muka Mukuru w’eihanga kandi minisita w’eby’obwegyese Janet Kataaha Museveni na minisita w’eby’amashanyarazi n’obugaiga bw’omu eitaka, Ruth Nankabirwa.

Purezidenti Museveni n'omukundwa we, Janet Kataaha Museveni barikuza omu motoka.

#WestUpdates