Buri kimwe kyahwire ahabw’omukoro gwa Kyabazinga ogw’okugaitwa.

N’ebya Donald Kiirya     
         
JINJA 

Buri kimwe kyoona kyahwire ahabw’omukoro gwa Kyabazinga, William Gabula Nadiope IV arikugaitwa n’omukundwa we, Jovia Mutesi (Inebantu wa Busoga).

Omukoro ogu guriho nyencakare Orwamukaaga ebiro 18/11/2023 aha kanisa ya Christ Cathedral Bugembe, omu rurembo orwa Jinja.

Aakibiishopu w’ekanisa ya Uganda, Stephen Kaziimba Mugalu nateekateekwa kuba niwe arikwija kugaita Kyabazinga na Inebantu kandi Purezidenti Yoweri Museveni nateekateekwa kuhika aha mukoro nk’omugyenyi w’omutaano wa Kyabazinga.

 Abanyamakuru beitu bataayaayire ekikaari kya Kyabazinga ekya Igenge Palace ahi bashangire abantu bari omunteebekanisa ez’ahamuheru aha mwanya ogu. 

Entebeekanisa z'omukoro gwa Kyabazinga ogw'okugaitwa na Inebant wa Busoga, Jovia Mutesi guriyo nigugyenda omu maisho.

Abagyenyi abarahike aha mukoro ogu bateebekanisiibwe ahari Igenge Palace.
 
Za teenti 5 ezirikugibwamu abantu abari ahagati ya 500-1000 eza kampuni ya Fotogenix Ltd zaheerize kuteebwaho kandi abagyenyi abetsirwe nimwo barahikire.

Za teenti ahi abagyenyi abaraije aha mukoro gwa Kyabazinga barashutame aharwamukaaga ahari Igenge Palace.

Okurugiirira ahari Katukiro wa Busoga, Dr. Joseph Muvawala obaire narambura ahi omukoro ogu gurikuza kuba naagira ngu buri kimwe kyona kyahwire kureeba ngu omukoro gwa Kyabazinga waabo gwabaho kandi gwahwa omu busingye.

Minisita w’eminyeeto omu bwa Kyabazinga bwa Busoga, James Mukembo naagira ngu abagyenyi 2,000 nibo barikuteekateekwa kwija aha kikaari kya Kyabazinga ahari Igenge na munonga abo abahairwe za kaadi.

Entebeekanisa z'omukoro gwa Kyabazinga ogw'okugaitwa na Inebant wa Busoga, Jovia Mutesi guriyo nigugyenda omu maisho.

Okurugiirira ahari Jame Mubi, Omugambirizi wa Pooriisi ahabw’ekyanga ekya Kiira, za kamera zaherize kuteebwa omu mwanya etari emwe ahi abagyenyi barikuza kwemereza ebiruka byabo kureeba ngu omukoro gwa Kyabazinga gwahwa omu busingye.

#WestUpdates