Ahabw’enki Bobi Wine yaatooraine Ssenyonyi?

N'eby'omushaki waitu

Enkiiko zikurataine ezaayetsirwe Orwakana aha ofiisi y’ekibiina ky’eby’obutegyeki eky’orubaju oruhakani ekya National Unity Platform ahari Kavule-Bwaise omururembo Kampala zikarugiiriramu empinduka omumpagi z’ekibiina ekirikukizayo obuhango omubarikuhakanisa Gavumenti.

Zikamara haihi eshaaha 8 z’okutensa. Eky’okuta Joel Ssenyonyi omubigyere bya MP wa Nyendo-Mukungwe, Mathias Mpuuga, kwebembera orubaju oruhakani omu ishengyero kikabanza kyahaajaanwaho akakiiko ka rwagati (Central Executive Committee) ak’ekibiina ahari shaaha 4 z’akasheeshe.

Aba akaiiko aka ku baaremirwe kwikirizana ahanshonga egi, orikwebembera ekibiina kya NUP, Robert Kyagulanyi, enshonga akagyohereza omukakiiko akakuru aka National Executive Committee akarimu abebembezi baingi b’ebibiina oteiremu na ba MP ba National Unity Platform.

Ahari shaaha nka 7 n’ekicweka z’eihangwe, omujwekyerwa wa Busiro East, Lubega Ssegoona akashohora orukiiko. Yaakuratirwa omujwekyerwa w’ishaza rya Butambala, Muhammad Muwanga-Kivubi ahari shaaha nka 7 n’edakiika 38.

Omwe ahabashagiki ba NUP agizire ngu ku yareebire Ssegoonan a Muwanga-Kivumbi barikuruga omurukiiko, kikaba nikyoreka ngu Ssenyonyi yatunga obw’omwebembezi w’orubaju oruhakani omu ishengyero.

Na nyine, ahari shaaha 7 n’edakiika 40, Kyagulanyi, Jolly Mugisha, omuhwezi wa mukuru w’ekibiina kya NUP orikukurira ekyanga ekya Burengyerwa-izooba, omuny’eishengyero w’ishaza rya Manjiya, John Baptist Nambeshe na Mpuuga nabo bakashohora.

Abebembezi, bakagaruka baaza omurukiiko rwa boona, ahi baamanyeise abandi beebembezi bakuru ahampinduka z’eby’obutegyeki omu ishengyero.

N’obu ebyarugiremu byabaire bitaragyenzire gye ahabwa Mpuuga, ahabwa Ssenyonyi owaakuriireho akakiiko ka COSASE bikaba bigyenzire kurungi

Omuhandiiki mukuru w’ekibiina kya NUP, Lewis Rubongoya, arangiriire nikwo kumanyisa ngu obwa mbwenu, Mpuuga naija kujwekyera NUP nka kamiishana ahakakiiko k’eishengyero.

Mpuuga naija kuza omubigyere by’omujwekyerwa w’orurembo rwa Mityana, Francis Zaake owaayihirwe ahakiiko bwanyima y’obutaikirizana na Sipiika w’ishengyero, Anita Amongi.

 N’obu enyimaho Ssenyonyi nawe ataraikiriizaine na Among ahanshonga zitari zimwe na zimwe, oteireho n’obu yaabeire naakora emirimo y’akakiiko, ba MP ba NUP bagizire ngu, okuza kwa Mpuuga ahakakiiko k’eishengyero, akarikwebemberwa Among, nikwija kukora ahabutaikirizana oburiho ahari Ssenyonyi na Among.

Nka mukuru w’orubaju oruhakani, Ssenyonyi naija kushutama ahakakiiko k’eishengyero, ekibiina ekirikucwamu embeera ya ba MP.

Enyimaho, abahanuuzi b’eby’obutegyeki bakateebereza ngu Ssenyonyi araayebembera orubaju oruhakani, bagumize ngu najwekyera abakuratsi ba Kyagulanyi ob’omuringo ogw’ekikoosi ekya Fire Base waagyera-gyeranisa n’ekikoosi ekya Mathias Mpuuga, ekyayegaitsire ahari NUP kutungiraho omugisha gw’okusinga akaruuru bwanyima y’obutaikirizana n’ekibiina ekya Democratic Party (DP).

Ku abuuziibwe ahanteekateeka za nyensya, Mpuuga agizire ngu akozire obutaruha kandi obwa hati naahurira okwesiima ahabw’oku abaasize kuha ba MP amaani n’obu habaire harimu ebizibu

“Tindikwefuuza okwebembera orubaju oruhakani ahabw’okuba n’omugisha gw’amaani. Tindikubaasa kwefuuza oku mkoreise amaani gangye goona kuguma nteeraine hamwe ba MP bangye,” nikwo agizire.

Ekikoosi kya ba minisita eky’orubaju oruhakani nikiheereza kumara emyaka 2 n’ekicweka kwonka ekibiina nikibaasa kucwamu kukora empinduka ninga kurekamu abatwire nibakora.

Aharwakataano, Kyagulanyi akagira ngu ekibiina kikacwamu kuhindura abeebembezi kuha omwanya abeebembezi abasya. Ayongyeire yaahimbisa Mpuuga ahabw’okukora omurimo gwe nka mukuru w’orubaju oruhakani omubwire obwabeire bugumire.

Aharubaju rwe, Ssenyonyi agizire ngu okutooranwa kwe kibeire ekiconco kuruga owa Ruhanga. Araganiise kukora na Mpuuga kwebembera orubaju oruhakani omu ishengyero ryona.

On his part, Ssenyonyi said his selection was a gift from God. He also pledged to work with Mpuuga in order to steer the opposition in Parliament across the divide.  

Ssenyonyi: Kuruga ahakushoma amakuru akaza ahakwebembera orubaju oruhakani.

Amakuru kuruga omu NUP nigagira ngu Mpuuga akaheebwa obwire burikumara kutereeza emikorere ye kwonka tarahindwireho omukukiika kwe omu ishengyero nikwo kureetera Kyagulanyi yaakora encwamu eyabaire etanguhi aharwakataano.

“Obugumisiriza bwa Kyagulanyi bukaguma nibukyendeera kuruga nk’ahagati y’omwaka oguhwaire n’obu Mpuuga yaacweiremu kuhindura obwebembezi kukwatagana n’obw’ekibiina. Tabaasize kugumya omurimo gwe kandi na hati Kyagulanyi nateekateeka ngu aba NRM bakamutamu orunwa kwebembera omumuringo ogwanguhi,” nikwo amakuru garikugira.

Amakuru nigongyera gagira ngu n’obu Mpuuga enshumi nkye ehwaire abaire ayikiriize kukoresa enkora ei Kyagulanyi arikwenda obwo arikuhindura omubwebembezi bwe, enkora ye ey’eby’obutegyeki ebaire etarikujwarana n’enkora y’okwesharinga ahanguuto kurahusyaho empinduka ya Gavumenti eri omubutegyeki

Omukwezi okwa 10 omwaka oguhwaire, Mpuuga aketonganirira n’enkora ye y’obwebembezi arikugambaho na rumwe ahampapura z’amakuru kandi yaagira ngu tarikwikiriza omuntu n’omwe kumwegyesa eby’obutegyeki.

“Tibakandeebire ndikwesharinga nakshohora omu ishengyero? N’abanyamazima ninga nibegirisa? Ninga haine obutumwa obundi obu barikugyezaho kwohereza kwonka tibaine mazima garikurangirira kurangirira ebigyendererwa byabo? Haine enshonga ei barikubaasa kuhayo, eyaabeire kuhendera omumuringo ogu etarahendeiremu?” Mpuuga nikwo yaabuurize.

Beitu nareebeka kuba yaikiriize kukora eki Kyagulanyi yaabeire nagamba. Aharwakabiri akata ahamukura gwa X ebishushani bya Francis Zaake arikwanga kuruga ahakazindaaro omu ishengyero agumize ngu kikareetwaho okuguubwa kubi.

“Kumara akaire, tutwire nituhayo enshonga omu ishengyero ahakuhamba abantu hamwe n’abantu kubura ekitaraariraine. Gavumenti hati ekwatsize akakoryo k’okwohereza ba Minisita kwija bakeehakana. Kandi okubuzibwaho kw’abantu nikweyongyera…kwine kurekyer’aho,” nikwo agizire.

Kyagulanyi ayorekire okutaana

Akaugaaniiraho n’abanyamakuru oku Kyagulanyi yaagizireho ebiro 30.11.2022, kukooreka okutaana ahagati ye na Mpuuga ahi yaatiinatiinise kubinga mukuru w’orubaju oruhakani ku yaakuremwa kwebembeza okurwanirira embeera nungi y’abantu abaamuteereire akaruuru bwanyima y’okuruga ahamuramwa ogu abashagiki be barikugira ngu nigwo guhikire kuhinduza Gavumenti. 

Bakaba bakiri aha ofiisi enkuru ez’ekibiina omuri Kamwokya omuri Kampala obu agira ngu akaba yaamanyeise abebembezi boona aba NUP oteiremu na Mpuuga ngu bashemereire kwebembeza okuba kurungi kw’abantu baabo.

“Ku orikwetwaramu nk’omuntu ori gye omumbeera mbi, nituba tutarikukukyenga,” nikwo Kyagulanyi yaagizire.

Abahanuuzi b’eby’obutegyeki bakagira ngu eki kikaba nikimanyisa ngu obutaikirizana ahagati ya ba MP omu NUP abarikukuratira Kyagulanyi na ba MP b’omurubaju orwa Mpuuga ahantwaza y’eby’obutegyeki oburikuhakanisa Gavumenti omu ishengyero obubaire nibwakamu omuriro mpora mpora buhikire bwarenga.

Kikahika ahakwikirizibwa ngu NUP eyatandikireho omugwa 2020 kandi hati ekibiina ky’orubaju oruhakani ekihango munonga omu ihanga, kirimu orujwangye kandi abarimu baabasa obutaguma hamwe kumara akaire

Kyagulanyi akagira ngu tihariho nshonga yoona erikureetera ba MP ba NUP kuba bari omu ishengyero barikutwara “obwa ngamba-nyenka bwa Purezidenti Yoweri Museveni n’obushomankuzi bwa sente z’anantu omumushana tuku nk’ekintu ekihikire obwo abantu baitu barikutuntuzibwa n’okwitwa”.

“Murekyer’aho ako akahugye k’okugamba ahabiragiro by’enkora y’obutegyeki. Tihariho kiragiro omu Uganda eki barikuta omunkora. Ekiragiro ky’okubanza n’okurinda obugabe bw’abantu baitu, kureebeka ngu abanya Uganda boona n’abantu,” nikwo yaagizire.

Akongyera yaashomera abebembezi ba NUP ekiragiro ky’eishengyero ahakurwana. “Mbwenu imwe abebembezi, mutakahajaanire ahasente ezi barikuza kuha Roko Construction Limited, mutakahaajaanire ahasente ezirikuza kwibwa zikabaganwa naimwe, mutakahaajaanire ahakwongyeza emishaara ya ba MP ninga abebembezi ba Gavumenti, reka tuhajaane ahakucungura abantu baitu n’okubaha obugabe bwabo,” Kyagulanyi nikwo yaabashabire.

Akasiima MP wa munisiparite ya Mityana, Hon Francis Zaake, “ahabw’obutaikirizana n’akahugye akari omu ishengyero”.

“Yebare obutahunama, yebare ahabw’okukora kyonyine eki abantu baakuteereire akaruuru. Ninkwesiimisa, NUP nekwesiimisa kandi n’abanya Uganda na munonga abo abaakwatsirwe nibakwesiimisa,” akagambira Zaake kandi hoona owaabeire atariho aharukiiko rw’abanyamakuru orwo.

Zaake akaba yaayohereziibwe omuhwezi wa sipiika Thomas Tayebwa ahakakiiko k’eishengyero nk’oku ebiragiro by’emicwe birikugamba ahakwetwaza kubi obwo yaamara kushomerwa ekiragiro nikyo kimwe.

Tayebwa akata orubanja ahari Zaake “orw’okugyezaho kutunga akazindaaro ataikiriziibwe” bwanyima y’okwanga kuhurikiriza okuragiira okwamuhairwe kushutama obu yabeire akiriyo nagamba ahakuhamba n’okubuzibwaho okwabeire nikuteekateekwaho kukorwa ahari ba MP b’orubaju oruhakani n’abandi banya Uganda.

#WestUpdates