Muka Mukuru w'eihanga arugire omu keshereko bwanyima y’okukira COVID-19.

N’ebya Omushaki weitu

Muka Mukuru weihanga kandi minisita w’eby’obwegyese, Janet Kataaha Museveni arugireho yaruga omu keshereko bwanyima y’okukira endwara ya COVID-19.

Kurabira aha mukula gwe gwa X, Pureizdenti Yoweri Museveni ahabiro 01/01/2024, atabaarukize abanya-Uganda ahabw’okuhendera omwaka gwa 2023 hamwe n’okutaaha omu mwaka omusya ogwa 2024.

“Amakuru marungi; Maama Janet akizire endwara ya COVID-19. Omu kasheeshe k’erizooba, bamwihaho ‘sample kuza kuzikyebera ah’eirwariro erihango erya Mbarara kandi nizoreka ngu takiine burwaire bwa COVID-19. Mwebare ahabw’eshaara zanyu,” Museveni arikushoborora.

Purezidenti Museveni akyorekire ngu nawe wenyini akyebiirwe beitu ashangire ataine Covid-19. 

Ahabiro 28/12/2023, Purezidenti Museveni akashohoza amakuru g’omukazi we Janet Kataaha kukwatwa COVID-19 arikukyoreka ngu akatandika kubura kwehurira gye aha kiro kikuru kya Nohiri eky’ebiro 25/12/2023.

“Ahabiro 25/12/2023, bwanyima y’okurya kyamushana n’aba famire, Maama Janet akatandika kukarakaatwa (sandy feeling) aha maraka. Abashaho bakaija bamwihaho sample ezibayoheereize ah’eirwariro erihango erya Mbarara kukyeberwa kandi ebyarugire omu kukyebera bikoreka ngu akaba aine COVID-19.

Ahon’aho, omu kasheeshe k’ebiro 26/12/2023, nkaba nyine kuza kwekyebeza kwenda ngu tucwemu okuturakore aha kizibu eki. Beitu ebyarugire omu kukyebera omu mwabazyo bikaija nibyoreka ngu tinyine burwaire bwa COVID-19, Museveni arikushoborora.

Nayongyeraho ngu bakacwamu ngu Maama Janet aze omu keshereko omuri emwe aha nju omuri Rwakitura omu disiturikiti eya Kiruhura kandi nyowe nkagumizamu na puroguraamu zangye nk’oku nabaire nziteebekaniise kuzikora beitu zitari zi maama yabaire arimu. Egi niyo nshonga ahabw’enki tutabaasize kuza Kyenkwanzi nainga okuza aha mukoro gwa Kaboyo.”

Museveni nakyoreka ngu abugaineho General wa Sudan, Hamdan Daglo kandi eriizooba ebiro 02/01/2024, ninyija kubuganaho abariisa b’ente z’amate kuruga omuri Kiruhura na Kazo.

#WestUpdates