Abantu baingi bashobangirirwe ahabw’okuhandiika aba LDU kwongyezibwayo- Kasese.

N’ebya Samuel Amanyire.

KASESE

Enkuyanja y’abantu kuruga omu miruka etari emwe omu disiturikiti eya Kasese omu kasheeshe k’orwakashatu beshukire ahari Mayor’s Garden omuri Kasese Munisiparite.

Abantu aba babaire baine amatsiko g’okugira ngu nk’okubakyera nibeija kuba ab’okubanza kuhandiikwa kwegaita omu kitongore ekyaba LDU nk’oku Purezidenti yaaragiire kubaasa kuhamya eby’okwerinda omu eihanga.

Abatuura ababaire bashobangiriirwe babaire bakuratiire ekiro ky’okubahandiika kuza omu bwa LDU omuri Kasese ebiro 10/01/2024. Beitu hoona, abo abahikireho bategyeriize kumara eshaaha zirengire omuri 3 hataine muntu weena orikubakoraho.

Aba bataahiriire ofiisi ya RDC ahi omuhwezi wa RDC, Zepher Mubingwa abagambiire ngu okuhandiika aba LDU omu disiturikiti eya Kasese kwongyeziibweho kuhisya ekiro ekindi ekirikwija kuba nikirangiirirwa.

Barikugambaho n’abanyamakuru beitu, abantu abamwe bagizire ngu basigire bagambire abanyabuzaare baabo ngu baaza kwegaita omu bitongore by’eby’okwerinda kubaasa kuhikiriza ebirooto byabo eby’okwegaita aha barwanirizi b’obusingye omu eihanga.

Ekihandiiko ekyashohoziibwe abarikukurira eby’amakuru omu ofiisi ya Purezidenti aha biro 20/12/2023 nikyoreka ngu Purezidenti Museveni akaragira amahe kugaruzaho aba LDU omu myanya eyetooroire amarindiro g’enyamaishwa nka; Queen Elizabeth National Parks, ebibira ebirimu omuri Kibaale, Kyenjojo na Kagadi hamwe na Semuliki National Park oteireho na Bwindi National Park.  

Okuragiira kwa Purezidenti kukaijaho bwanyima y’okutaahirirwa kw’emirundi erengire omuri 3 omu mwaka gwa 2023 okwakozirwe abarikuteekateekwa kuba abahekyera ba ADF okwafeeriiremu abantu baingi.

#WestUpdates