Okwemereza okubaaga n’okutambuza ahabw’endwara ya kooto- Ibanda.

N’ebya Timothy Mushabe

IBANDA

Abeebembezi omu disiturikiti eya Ibanda bemeriize okubaaga n’okutambuza amatungo bwanyima y’okubarukaho kw’oburwaire bwa kooto.

Okurugiirira aha mushaho w’eby’amatungo wa disturikiti egi, Hillary Arinaitwe - emihingo eteirweho neija kumara ebiro 30 kandi niheija kuba hatariho okubaaga n’okutambuza amatungo omuri Ibanda Munisiparite na Ibanda South.

Oburwaire bwa kooto omu disturikiti ya Ibanda bwizire nibuteganisa disiturikiti egi kumara obwire buringwa.

Omu kwezi kwa 11, 2023, abantu 9 kuruga Rugaaga omuri Keihangara bakakwatwa oburwaire bwa kooto beitu bakaija batwarwa ah’eirwariro erya Kagongo kuragurirwa ahi yakiriire.

Dr. Hillary Arinaitwe naagira ngu obwire obwo, ente 2 nizo zaafiire ahabw’endwara egi.

Nayongyera agira ngu omwaka ogu, egomborora eya Rukiri hariyo abantu 12 abari aha kukuratirwa bwanyima yokworeka obubonero bw’endwara ya kooto kandi ente 2 zifiire omuri Kigarama woodi omu Munisiparite ya Ibanda.

Ente erikuba eitsirwe oburwaire bwa kooto n’efa eri nk’etarweire kandi yaheza kufa bwanyima y’okufa nezimba enda, ereeta eshagama omu buhengyere bwayo nk’omunyondo, amatu n’omu bicweka ebindi, Okurugiirira ahari mushaho- Hillary Arinaitwe.

#WestUpdates