Janet Museveni kushwijuma sente za PDM ezikyerereirwe omuri Buikwe

N’ebya Prossy Nandudu

Muka Mukuru w’eihanga kandi minisita w’eby’obwegyese n’eby’emizaano, Janet Museveni n’ow’okugaaniiraho n’abatuura b’omuri Nyenga omu disiturikiti ya Buikwe arikucondooza amakuru agarikurugayo gagumize ngu ebyanga biremirwe kutunga sente z’okutunguura emiruka zeete eza Parish Development Model.

Eki kyagambwa mukuru w’eihanga, Purezidenti Yoweri Museveni obu yaaba nagaaniiraho n’abantu abaayerundaanira ahari Waikitaka Primary School omuri Jinja ahakujaguza ekiro kya NRM kuzaahuura eihanga okw’omurundi gwa 38.

“Omukasheeshe k’eriizooba obu twaba nitwija ahamukoro ogu twaba nitwemerera omumyanya etari emwe n’emwe kugaaniiraho n’abanya Uganda abaaba batutegyerereize ahanguuto. Ku twaba nitugaaniiraho na bamwe, Minisita yaababuuza ku baraabe nibatunga sente za Parish Development Model, baagira ngu tibakatunga ga sente ezo. Ngu nibazihuriza amatu kwonka. Naija kugarukayo omumwanya ogwo omuri Nyenga kubugana abantu abo n’omujwekyerwa waabo omu ishengyero kumanya ekyabeire aha sente ezo,” Museveni nikwo yaagira.

Nyenga ni rimwe ahamagomborora agari haihi n’orurembo rwa Jinja.

Okururugiirira ahari Purezidenti, abantu aba baayetomboitira enshonga nyingi ezirimu okwiba emizimu, okubinga abaana omumashomero hamwe n’okuremwa kutunga sente za Parish Development Model.

Parish Development Model ekatandikwaho gavumenti kureebeka ngu abantu baatunga sente kutunguura entaasya y’amaka gaabo kureetaho empinduka omuby’entaasya omubantu.

PDM obwa hati!

Okurugiirira ahakitongore ky’eby’empiiha, embariirira n’entunguuka omuby’entaasya sente zirikurenga omuri shiringi akatabarwa kamwe zaaheirweyo omu SACCO omunkora yap ARISH Development Model.

Arikugambira eishengyero enshumi nkye ehwaeire, minisita w’emirimo omukitongore ky’eby’empiiha, Henry Musaasizi agizire ngu sente zikaza omu banka aha akawunti za SACCO omu Gavumenti 176 z’ebyanga hamwe n’omu Kampala Capital City Authority.

Musasizi ayongyeireho ngu omumwaka gw’eby’empiiha ogu, ekitongore kiine enteekateeka y’okugaba sente omurundi ogwa kashatu n’ogwa kana siizoni y’okubyara etakahikire.