Museveni ashabire kuhabaho okurinda eby’obuhangwa.

N’ebya David Magere

GULU

Purezidenti Yoweri Museveni ashabire abanya-Uganda okwejumbira omu kurinda ebisharara aha rurengo rwabo nk’abantu.

MN’obu Purezidenti asiimire omurimo ogukozirwe minisiture y’eby’amaizi n’obuhangwa bw’ensi omu kurinda eby’obuhangwa omu Uganda, Museveni naagira ngu omurimo gw’okurinda eby’obuhangwa n’ogwa buri munya-Uganda kurugira kimwe ahansi kuhika aha rurengo rw’ahaiguru.

Okushaba kwa Purezidenti kubaire kuri omu butumwa bwe obumushomiirwe minisita orikujunanizibwa emirimo yoona omu ofiisi y’enganzi y’eihanga, Justine Kasule Lumumba aha mukoro gw’eihanga ogw’okujaguza ekiro ky’eisharara omunsi yoona ekya World Wetland Day. 

Emikoro egi ebaire omu rurembo orwa Gulu aharwakataano ebiro 02/02/2024.

Ahabwire abanya-Uganda okurekyeraho kuhinga aha mihegyeyo y’ebisharara ahabw’okuba eki nikireetera eby’obuhangwa byasisikara.

Purezidenti ahaire eky’okureeberaho ky’emirimo erikureetera ebisharara byasisikara nka okwijuza omushenyi omu bisharara, okutimba ekisharara, okuhingamu n’ebindi.

Museveni akyorekire ngu obwo gavumenti erikugumizamu n’okuta amaani omu kurinda ebisharara, hariho puroguraamu nyingi eziteirweho ezirimu; Manifesto ya NRM, Parish Development Model (PDM), National Development Plan (NDPL) III, National environment Act 2019 hamwe n’ebiragiro ebi Purezidenti arikutaho kureeba ngu byahweraho omu kurinda emyanya egyo nk’okurwanisa obworo.

Ashabire abeebembezi ahandengo zoona okutaho ehururu bakashomesa abantu aha ku bakubaasa kurindamu eby’obuhangwa.

#WestUpdates