Okushwijuma okutunguura ekitagata ky’omugabe

Okushwijuma okutunguura ekitagata ky’omugabe

N’ebya Bruno Mugizi

Sheema:

Minisita w’eihanga ow'eby'oburambuzi, n’enyamaishwa hamwe n'eby'omumaizi Martin Mugarra Bahinduka hamwe n’abandi bakuru kuruga omu minisiture egi bashabirwe akakiiko k'ebyobushuubuzi omu paramenti ngu bashoboorore oku sente zirikuhika biriyooni 1.26 ezabahairwe kwombeka ekitagata ky’omugabe zakozesibwe.

Abany’eishengyero aba obwo beebembeirwe Ceeyamaani w’akakiiko aka kandi ori omuny’eishengyero wa Mbarara City South, Mwine Mpaka babaire beizire kureeba oku emirimo y’okwombeka ekitagata yaahika.

Minisiture y'eby'esente ekaha Minisiture y'eby'oburambuzi biriyooni 1.26 kuhunduuza ekitagata..(Photo by Bruno Mugizi)

Omumwaka gwa 2021, Minisita wa gavumenti z’ebyanga, Raphael Magyezi akaragiira ngu ekitagata ky’omugabe ekirikushangwa omu tauni kanso ya Kitagata omu disiturikiti ya Sheema kihindurwe eky’oburambuzi hamwe n’okuhindurwa omwanya gw’okuhuumuriramu.

Omwaka gw’ebyesente ogwahwire, minisiture y’ebyesente ekaheereza minisiture y’eby’oburambuzi sente zirikuhika biriyooni 1.26 kutandika kukyombeka kwonka abany’eishengyero nibagira ngu emirimo ekozirwe terikwingana na sente ezabahirwe.

Ekitagata ky'omugabe ekirikushangwa omu tauni kanso eya Kitagata, Sheema...(Photo by Bruno Mugizi)

Jemimah Buhanda, ow’entebe yakataano ahabwa Sheema ayetomboitire akakiiko ngu bo nk’abeebembezi ba disiturikiti batwire nibazibirwa ba konturakita kuhika ahamwanya ogu kureebuza purojekiti ya gavumenti.

Mwijukye Francis, Omuny’eishengyero wa Buhweju agiizire ngu akakiiko kashangire ngu abakuru kuruga omu minisiture nibakoragana na konturakita kwiba sente z'omuhi w'omushoro.

Akakiiko nikenda Minisiture eshoboorore oku esente zakoresiibwe...(Photo by Bruno Mugizi)

Prof. Elijah Dickens Mushemeza ori MP wa Sheema South agiizire ngu paramenti tibarikwija kuheereza aba minisiture sente ezindi batabandize kworeka oku sente ezabahirwe zakozesibwe.

Beitu we Minisita w’eihanga ow’ebyoburambuzi Martin Mugarra Bahinduka, ashabire ba konturakita kuguma nibeikiriza abeebembezi omu disiturikiti kurambura purojekiti egi agumize ngu nikija kuyamba omukureebuza emikorere mibi y'emirimo.

#WestUpdates