Aba boda 2 bakwatsirwe ahabw’okwibaho omushabaazi miriyooni 4

N’ebya Simon Masaba 
Poorisi y’ekyanga ekya Rwizi bakwataniise na diviijoni ey’amatemba g’Orurembo orwa Mbarara, baakwatsire abavugi 2 ba piki za boda boda barikuteekateekwaho kuba beejumbire omubushuma. 

Abakwatsirwe bamanyirwe nka Taremwa Mathias ow’emyaka 18 kandi omutuura w’ekyaro kya Rwemikoma omuri Bushenyi na Kwesiga Wilber ow’emyaka 32 ow’omu Lubiri, waadi ya Nyamityobora omururembo rwa Mbarara.
Omugambirizi wa poorisi, Fred Enanga naagira ngu okukwata aba kwizireho omukakwate k’okwiba shiringi 4,200,000 ahari Judith Nuwamanya omushuubuzi-kazi orikutuura omukyaro kya Katojo
Amakuru nigagira ngu Nuwamanya akatemba boda erikuvugwa Kwesiga aha fakitore y’emifarasi ya Rose Foam omuri Biharwe omururembo rwa Mbarara arikworekyerera ogwa Koranorya omukatare ahi arikukora. 

Beitu hoona bwanyima y’akagyendo kakye, Kwesiga akeemerera kutwara mutaahi we, Taremwa, okurugiirira ahari Enanga.

Naagira ngu ku baahikire Migamba, ababiri aba bakata Judith rwagati yaabo kandi baakyama barikuruga aha ruguuto. Nibwo Taremwa ayihayo omusyo akaguhuuba arikutiinisiriza Judith kandi bakamwibaho ebintu bye.

Enanga naagumizamu agira ngu piki ekoresiibwe omumushango ogu, ehandiikirwe omu namba UFV 652F ey’ekika kya Bajaj, ab’obushoboorozi bakagitooza kandi baagikwata.
Bwanyima y’okucondooza, abarikuteekateekwaho aba bakakwatwa abanyabiragiro. Obwa hati bateirweho emishango y’obushuma, kandi na piki ekwatsirwe nk’obuhame bw’omushango

#WestUpdates