Ebigombe by’ebeeteeraine kwehandiikisiza ahari za karimagyezi

Eli Akiza, Mbarara.

Ekitongore ky’eby’obushuubuzi kitongoize enkora y’okuhandiikisa ebigombe by’abeeteeraine kurabira aha mikutu ya karimagyezi omuri Mbarara.

N’ekigyendererwa ky’okwangusya obuheereza bw’okuhandiikisa ebigombe by’abeeteeraine hamwe n’endiijo mirimo ya Cooperatives, ekitongore ky’eby’obushuubuzi kitongoizeho enkora ahi baraije kuba nibakozesa za karimagyezi kukora emirimo nk’egi.

PHOTO: Eli Akiza

Enkora egi eyetsirwe Cooperatives Registry Management Information System kandi neija kuba nehwera abeebembezi b’ebigombe by’abeeteeraine obutatambura engyendo ningwa kuza Kampala kuhandiika hamwe n’okutwara empapura z’ebigombe byabo.

Hatwireho ekyetengo na munonga aha nkora y’okuhandiikisa ebigombe by’abeeteeraine hamwe n’endiijo mirimo yaabo kandi aba batungire akamwenyo aha matama bwanyima y’ekitongore ky’ebyobushuubuzi kutongoza enkora egi.

Cooperatives Registry Management Information System neija kuhwera bakuru b’ebigombe eby’abeeteeraine kuhandiika ebigombe byabo, hamwe n’okuhayo ebindi bihandiiko bitari bimwe na bimwe omu kitongore ky’eby’obushuubuzi.

PHOTO: Eli Akiza

Minisita w’eby’obushuubuzi Francis Mwebesa kurabira aha mukutu gwa kanyabwengye ashabire abantu okwejumba omunkora egi.

Abakuru omu kitongore eki nibagira ngu enkora egi neija kumaraho obuhinzya-mutima obutwireho omu bigombe by’abeeteeriine omu ihanga.

Okucondooza kuruga omu kitongore kya Gavumenti ekirikushugaanisa ebigombe by’abeeteeraine ekya Uganda Cooperative Alliance, UCA, nikworeka ngu omubaro mwingi gw’ebigombe by’abeeteeraine tibirikuhangaara ahabw’okutandikwa bitaine bigyendererwa bishoboorokire.

#WestUpdates