Paramenti kushwijuma ba minisita abasya eriizooba.

N’ebya Umar Kashaka

Akakiiko ka Paramenti akarikushwijuma abantu abarikuba batoorainwe nibeija kushwijuma ba minisita abasya abaherize kutooranwa eriizooba Orw’okubanza ebiro 25/03/2024.

Adolf Mwesige, karaani wa Paramenti ahamize amakuru aga aha Sande kandi naagira ngu akakiiko akarikukurirwa Siipika Anita Among nikeija kushutama shaaha 4 z’akasheeshe kushwijuma ba minisita.

Abanyamakuru tibarikwikirizibwa omunkiiko z’okushwijuma ba minisita kandi ekiragiro nikigira ngu Siipika naheebwa ebiro 3 by’okukora kugambira Purezidenti Museveni kurabira omu buhandiikye ebirikusharwamu akakiiko aha muntu weena orikuba atoorainwe Purezidenti.

Omumpinduka z’aba minisita n’amahe ezikozirwe aharwakana, Purezidenti Yoweri Museveni anagire minisita w’enshonga z’amahe Vincent Ssempija kandi omu mwanya gwe atiiremu Jacob Oboth-Oboth otwire ari minisita w’eihanga omu minisiture egi.

Purezidenti nabwo anagire ba minisita 2 abarikujunanwa okuryangatanisa amabaati g’abantu ba Karamoja abarimu Mary Gorette Kitutu hamwe na Agnes Nandutu kandi omu myanya yaabo hateirwemu minisita w’eihanga ow’eby’obugaiga bw’omu eitaka Peter Lokeris hamwe n’omuny’ishengyero-kazi wa disiturikiti eya Sironko, Florence Namboozo.

Nabwo agarukire yanaga minisita w’eihanga ow’eby’obushuubuzi n’ebigombe by’abeteraine Harriet Ntabazi kandi omu mwanya gwe hagiiremu Mukuru w’amahe ga UPDF, Gen. Wilson Mbadi orimu naruga omuntebe egyo.

Omu mwanya gwa mukuru w’amahe g’eihanga ogu Gen. Mbadi abaire arimu kugibwemu Gen. Muhoozi Kainerugaba- mutabani wa Purezidenti kandi ori n’omuhabuzi mukuru wa Purezidenti aha mirimo y’omutaano.

Omutebeekanisa w’ebivuro kandi Omushuubuzi Balaam Barugahara Ateenyi atoorainwe nka minisita w’eihanga ow’enshonga z’eminyeeto n’abaana nikwo kuza omu bigyere bya Sara Mateke otoorainwe nka minisita w’eihanga ow’enshonga z’amahe n’abaazirwanireho.

Barugahara atoorainwe na mutaahi we omu kigombe ekya Patriotic League of Uganda kandi ori omuny’ishengyero-kazi wa disiturikiti ya Kitgum, Lilian Aber nka minisita w’eihanga ow’ebigwererezi n’enshonga z’empungi nikwo kuza omu bigyere bya Esther Anyakun oteirwe omu minisiture y’ekikura ky’abantu nka minisita w’eihanga ow’eby’emirimo.

Museveni atooraine omuhandiiki we, Dr. Kenneth Omona nka minisita w’eihanga orikujunanizibwa ahanshonga za Bukizi bwa Bumosha bwa Uganda arikuza omu bigyere bya Gloria Omaswa. 

#WestUpdates