Endwara y’okutukura amaisho ebarukireho omuri Bushenyi.

N’ebya Bruno Mugizi. 

BUSHENYI- Disiturikiti ya Bushenyi ehamize okubarukaho kw’endwara y’okutukura amaisho (Red Eye) omu disiturikiti.

Dr. Mwesigye Edward- mukuru w’eby’amagara ahabwa disiturikiti eya Bushenyi naagira ngu baaherize kuhandiika abantu abamwe kuruga omu magomborora nk’eya Kyeizooba, Nyabubare, Kizinda-Kigoma tauni kanso, Rwentuuha tauni kanso hamwe na Bushenyi-Ishaka Munisiparite aine endwara y’amaisho.

Mwesigye nahabura abantu, amashomero hamwe n’amarwariro okutaho emiringo y’okutangira endwara egi nk’abantu kuguma nibanaba omungaro na sabundi buri kaire, okwerinda okwekwatakwata omu maisho n’endiijo.

Robert Atuhairwe, RDC wa Bushenyi nahabura abantu okwerinda okukwatana omungaro kandi bareebukye ngu bakyebera n’okushwijuma abantu abarikwija kubataayaayira.

Bumwe aha bubonero bw’omuntu oine endwara egi harimu okutukura kw’amaisho, okushaasha omu maisho, amaisho okureeta amaizi hamwe n’okuziimba ahaifo y’amaisho.

#WestUpdates