Omuserukare wa UPDF afeereire omuri butandu ahari Mabira

N’ebya Charles Etukuri

Omuserukare w’amahe ga UPDF afeereire omu butandu yamotoka ebaire ahanguuto eya Kampala-Jinja omu disiturikiti ya Buikwe.

Maj. Nsamba Habib Katakabire afiire bwanyima y’emotoka ye eya Toyota Land Cruiser namba UBQ 424N kutoomerana buso-bwantama na rukurirana ahakibira ekya Mabira ahari Sanga eihangwe ry’orwakataano.

Kurugiirira ahamugambirizi wa pooriisi ey’ekyanga ekya Ssezibwa, Hellen Butoto naagira ngu Maj. Katakabire abaire naaza Jinja arikuruga Kampala.

Butandu egi ebaire ahagati y’emotoka ishatu; Toyota Land Cruiser, rukurirana namba UBP 644S/UBP 770N hamwe na Toyota Corona Premio namba UBP 411L.

Nikigambwa ngu omuserukare ogu abaire nayenda kuraaba ahamotoka ezindi nikwo kutoomerana na rukurirana ebaire neruga orubaju orundi. Emotoka ye eyeraabiremu nikwo kutoomera Premio ebaire neza Jinja.

Katakabire afeereireho, dureeva wa rukurirana atungire obuhuta nikwo kutwarwa ah’eirwariro erya Kawolo omuri Lugazi kuragurirwa. Obaire navuga Premio nawe ahoonire.

Okucondooza nikugumizamu.

#WestUpdates