Bashatu baitsirwe omu muringo gutarikukyengwa omuri Kanungu.

N’ebya Omushaki weitu

KANUNGU

Abantu bashatu omu disiturikit ya Kanungu baitsirwe omu muringo gutarikwetegyerezibwa.

Elly Maate, Omugambirizi wa Pooriisi ahabwa Kigezi nagamba omuntu w’okubanza oitsirwe nka Arinaitwe Simple,45, omutuura wa Ibumbwe omu gomborora eya Katete orikugambwa kuba aheererukire kureebwa ari omu baara ya Kojo ebiro 23/04/2024 shaaha nka 4:30 z’ekiro aine Godfrey Kamugisha- omushomesa, Innocent Tayebwa hamwe na Dickson Tayebwa beitu nyomwebazyo ebiro 24/04/2024 shaaha nka 12 zakasheeshe, ashangirwe afiire n’omutumbi gwe gurambiire aha rubaju rw’enguuto ya Mutojo-Ibumbwe.

Omugyenzi nagambwa kuba abaire aine esente ahabw’okuba abaire nashuubura ente kandi arikuheereza na kafuna.

Nayongyera agira ngu nyomwebazyo shaaha nka 7 z’eihangwe, obu abantu bamanyire okufa kwa Arinaitwe, bateekatekire ngu abantu abu abaire aine omu baara nibo bamwtsire. 

Eki kireteire abantu baruga omu mbeera nikwo kutaahirira Godfrey Kamugisha, omutuura w’ekyaro nikyo kimwe bakamukwata kandi omu kumubuuza akasyo n’akahindu, agambire bataahi be nikwo kumuteera bakamwita.

Maate naagira ngu Pooriisi emanyisibweho, nikwo kurahuka kuhika aha mwanya ekashanga abantu baherize kumwita beitu ebaasize kucungura Innocent Tayevwa obaire ari omu mbeera kandi aizire yafeera ah’eirwariro erya Kambuga ahi abaire airukangiziibwe.

Maate nashaba abantu okwerinda okutwarira ebiragiro omungaro zaabo beitu bagume bakorese ab’obushoborozi n’ebitongore by’okwerinda kukwata abarikuteekatekwaho kuba enkozi z’ebihagaro abarije kubahayo aha Pooriisi kujunanwa nk’oku ebiragiro birikugamba.

Naagira ngu omuntu omwe yaherize kukwatwa kuhweraho Pooriisi omu kucondooza kwayo okuriyo nikugyenda omu maisho.

#WestUpdates