Bakuru b’amarindiro g’enyamaishwa nibashabwa okurinda eby’obuhangwa

N’ebya Eli Akiza

Kiruhura:

Nk’omuringo gumwe gw’okutunguura hamwe n’okurinda eby’obuhangwa, abarikwebembera amarindiro g’enyamaishwa hamwe n’endiijo myanya nk’ebibira nibashabwa okwongyera kukwatanisa n’abeebembezi b’ebyanga hamwe n’abatuura abahereire emyanya egi.

Ebi bigambirwe aha mukoro gw’okusibura otwiire ari mukuru w’eirindiro rya Lake Mburo National Park, Asa Kule Musinguzi ohumwiire hamwe n’okwakira omusya.

Ebi bigambirwe ahamukoro gw'okusibura Asa Kule Musinguzi...(Photo by Eli Akiza)

Omukoro ogu gukoreirwe omu irindiro ry’enyamaishwa erya Lake Mburo National Park kandi guhikirweho abakuru kuruga omu kitongore ekya UWA hamwe n’abandi kuruga omu bitongore ebindi eby’okwerinda hamwe n’abeebembezi batari bamwe na bamwe aha ndengo zoona.

Omukoro ogu gukoreirwe ah'eirindiro erya Lake Mburo National Park...(Photo by Eli Akiza)

Orikukurira bakuru b’amarindiro g’enyamaishwa omu eihanga, Charles Tumwesigye asiimire Kule ahabw’okuba omwesigwa kandi ashabiire abandi okwetwazagye omu bantu.

Arikugamba aha mukoro ogu, Asa Kule Musinguzi asiimire abo boona abamukwatsize omu buheereza bwe kandi yaahiga abato abakiri omu ma ofiisi okukorera omu mazima n’oburingaaniza.

Ogu abaire aheerize emyaka erikurenga 8 ari mukuru w’eirindiro ry’enyamaishwa erya Lake Mburo kandi akebemberaho agandi marindiro agarimu Kibale Conservation Area, Bwindi, Kidepo Valley National Park hamwe n’ahandi kandi Edson Nuwamanya omugiire omubigyere akwatsibwe ofiisi omu butongore.

#WestUpdates