Fort Portal kutaayayisa okujaguza ekiro ky’abakozi

N’ebya Rogers Sunday

Orurembo rwa Fort Portal orwetebeekaniise kutaayayisa okujaguza ekiro ky’abakozi eky’ensi yoona, obwa hati, ruri yanga-yanga n’emirimo ya nyencakare 01.05.2024.

Okujaguza okw’eihanga ryona nikwija kukorerwa ahakishaayi kya St. Leo’s ahagati y’orurembo.

Eby’obushuubuzi omururembo.

Christina Linda, owa hoteeri omuri Fort Portal, eriizooba yaagambira TV West ngu okutaayayisa okujaguza kw’ihanga ryona n’omugisha gw’eby’obushuubuzi byabo.

“Ahabw’okugira ngu abagyenyi abaingi baahikire omu, obwa hati, ebyombeko ebimwe ebi abantu barikuraaramu byaijwire,” Linda nikwo yaagira.

Okurugiirira ahari Linda, okutaayayisa okujaguza okw’orurengo rw’eihanga ryona tikurikugasha rurembo rwa Fort Portal rwonka beitu nikuganyira Obukama bwa Toro bwona kandi kworeka amaani g’obukama obu omu ihanga.

Ali Musa, omusiiki wa chapatti, enshumi nkye ehweire aherize kugira ngu emishuuburo yaabo etuubuukire.

“Ebiro ebi, abaguzi bangye abaingi ti batuura ba Fort Portal bonka beitu harimu n’abagyenyi abaizire omukujaguza ekiro ky’abakozi,” Musa nikwo agizire.

Rumwe aharuguuto rw'orurembo Fort Portal. Orurembo oru nirwo ruraataayayise okujaguza ekiro ky'abakozi nyencakare ebiro 01.05.2024. PHOTO: Rogers Sunday

Moses Kugonza, omuvugi wa Boda Boda, yaagira ngu entebeekanisa z’okujaguza zishagikire bizinensi ye.

“Ahi bwaza kuhikira shaaha 9 z’eihangwe eriizooba, naaba naakozire shiringi 100,000, wagyera-gyeranisa na shiringi 40,000 ezi ndikukira kukora buriijo. Abarikunshagika omumurimo gwangye n’abagyenyi abatarikwetegyereza kurungi orurembo rwa Fort Portal,” Kugonza nikwo yaagira eriizooba ry’Orwokubanza eri.

Okwetomboitwa omubarikuha obuheereza

N’obu ekicweka ekimwe eky’abashuubuzi kiraabe kishemereirwe ahabw’okutaayayisa okujaguza kw’ekiro ky’abakozi, hoona embeera terikushushanira abarikuha obuheereza omukyanga.

Wilson Ategeka, omushuubuzi omururembo Fort Portal, yaagira ngu obuheereza bwona bwihirwe kuruga Kampala.

“Nobaasa obutakiikiriza kushanga ngu nangwa n’obutebe obwa ‘purasitiika’, obuju bw’okwejuniramu, ebyokurya n’ebyokunywa ebirikuza kukoresibwa ahakujaguza ekiro ky’abakozi biguzirwe kuruga Kampala kandi byareetwa Fort Portal,” Ategeka nikwo yaagira.

Mary Kabatooro, ondiijo orikuha obuheereza, yaagira ngu okujaguza kw’ihanga ryona kukaabeire kuri omugisha omuby’obushuubuzi nabo kuganyirwa ahamugaati gw’eihanga, beitu hoona tikwo kibeire.

“Ahamuheru gwa byona, noija kushanga ngu, ahi sente nyingi zirihwereire omukutebeekanisa okujaguza, Fort Portal etungireho oburagarikira bwonka,” Kabatooro nikwo yaagira.

#WestUpdates