Pooriisi necondooza okuteeraho kwita ow’eby’esente ahabwa Kamuli.

N’ebya Doreen Musingo

JINJA

Pooriisi omu disiturikiti ya Kamuli etandikire kucondooza ekikorwa ky’okuteeraho kwita orikukurira eby’esente omu disiturikiti eegi, Alex Kifuuse.

Omugambirizi wa Pooriisi ahabw’ekyanga ekya Busoga North, Micheal Kasadha naagira ngu ekikoosi ky’abainazi abatakamanyirwe batahiriire Kifuuse omu maka ge shaaha 3 z’ekiro bamucumita ekisyo.

Kasadha nakyoreka ngu eki kibaireho Orwakabiri ebiro 30/04/2024 omu woodi ya Muwebwa omuri Kamuli Munisiparite.

“Obu Kifuuse abaire ariyo nataaha omunju, ekikoosi ky’abainazi abatakamanyirwe bamukwatsire bamucumita n’emihoro aha mutwe, amaraka, omu kifuba n’emikono,” Kasadha arikushoborora.

Okurugiirira ahari Kasadha, okucondooza okwahikireho nikworeka ngu Orwakana rwa wiiki ehwaire, omuntu omwe agambiire Kifuuse aha nteekateeka z’okumuteera akamwita. Kifuuse, beitu hoona, tarakifiireho kandi tarahababire n’aha Pooriisi.

Kifuuse, oizire kuhwerwa abanyambabazi airukangiziibwe ah’eirwariro erihango erya Jinja kukyeberwa.

Kasadha nashaba buri muntu owakubaasa kuba aine amakuru g’okwita ahababe aha Pooriisi obwo okucondooza kurikugyenda omu maisho.

Okurugiirira ahari rupoota ya Pooriisi ey’emishango ey’omwaka 2023, emishango 1,085 ey’obwitsi eyarugiriire aha kuteera niyo yahandiikirwe omu mwaka gwa 2022 wagyeragyeranisa n’emishango 1,095 eyahandikirwe omu mwaka gwa 2021.

#WestUpdates