Rotary Club za Mbarara zitungire abebembezi abasya ahabw'omwaka 2024/25
Rotary Club of Mbarara nabo batungire Purezidenti omusya owa 40 okwiha kiraabu egi netandikwaho
Angella Ainomugizi arikuheebwa omudaari kuruga owa Wilson Ampumwize. PHOTO: Adolf Ayoreka.
By NewVision Reporter
Journalists @NewVision
N'ebya Adolf Ayoreka
Habaireho emikoro y’amaani aha wiikendi ehwire obu Rotary Club of Mbarara Ranchers hamwe na Rotary Club of Mbarara babaire nibahindura obwebembezi okutunga obusya ahabwa omwaka 2024/2025.
Ishmael Mitooma, arikwakiira omudaari gw'omutaano bwanyima y'okuha Rotary obuhwezi bwa doora 1,000
Aba Rotary Club of Mbarara Ranchers beemekire Purezidenti wa 4 kandi ogu amanyirwe nka Angella Ainomugizi. Ogu nawe atooraine akakiiko kye k’abeebembezi aku araakore nako nayo kandi omukoro bagukoreire aha Las Vegas Hotel omuri Mbarara. Ogu abaire naaza omubigyere bya Dr. Richard Atuhairwe obaire ari Purezidenti wa 3 kwiha kiraabu egi netandikwaho.
Wilson Ampumwize, mukuru wa County Cinema hamwe na Sheila Agaba mukuru wa Stanbic Business Incubator nibo babeire bari abagyenyi bakuru kandi Ampumwize ahaireyo 8,700,000 okuhwera aba kiraabu egi okushembusya purogyekiti yaabo ey’okukwatiraho eishomero rya Kamatarisi Primary School ahi bariyo nibahunduuza ebibiina hamwe n’okutaho eibiikiro ry’ebitabo.
Patrick Salvador owakatemba niwe ekyamwiire abantu.
Patrick Idring Salvador, owa katemba aricamura abagyenyi ahamukoro gw'aba Rotary aha Las Vegas Hotel nyomwebazyo ebiro 03.06.2024. PHOTO: Adolf Ayoreka
Omunkora niyo emwe, aba Rotary Club of Mbarara nabo batungire Purezidenti omusya owa 40 okwiha kiraabu egi netandikwaho kandi ogu amanyirwe nka Ishmael Mitooma ogiire omubigyere bya Don Douglas Mugyenyi obaire ari purezidenti wa 39. Emikoro egi ekoreirwe aha kitebe kikuru ekya Rotary House omu Kiyanja, omururembo rwa Mbarara kandi Keneth Wycliffe Mugisha (Past District Governor) niwe abaire ari omugyenyi mukuru.
Ahamukoro nigwe gumwe, ba memba batari bamwe na bamwe bahairwe za ‘pin’ ezirikwetwa Paul Harris Fellow (PHF) ahabw’okushanga ngu babaasize kuheerezayo esente ezirikurenga doora 1,000 okuhwera emirimo omu Rotary Foundation.
Bamwe ahaba Rotary kuruga omu Rotary Club Of Mbarara Ranchers abahikire ahamukoro gw'okwemeka Purezidenti wa 4 ahari Las Vegas Hotel omururembo Mbarara City. PHOTO: Adolf Ayoreka
Paul Harris Fellow(PHF) niwe yatandikire Rotary omunsi yoona kandi akagitandika na Rotary Club of Chicago omumwaka gwa 1905 n’ekigyendererwa kyokuhwera abantu abataine kihwera okurabira omubuheereza bw’ebyamagara, okushoma, okutunguura eby’obuhangwa, okureeberera abaana bato hamwe n’okubatangira endwara omumahanga gatari gamwe na gamwe.
#WestUpdates