Babakutte bava kubba mupoliisi e Makindye

Okubakwata kyaddiridde okuwalampa ekikomera ne bayingirira owapoliisi David Balaba akolera e Mpigi ne bamunyaga ebintu omwabadde ttivi, akagaali k’amaanyi g’ekifuba, obugatto bw’abaana ne kalonda omulala ku ssaawa nga 10:00 ez’ekiro ekyakeesezza Olwokusatu.

Aba LC mu kitundu kino baabalondodde ne babagwako nga babikukulidde mu bukomera ku kkubo erigenda ku kifo ekisanyukirwamu ekya Club Leatic nga batumizza bodaboda babitikkeko ne babagombamu obwala.

Basoose kubaliggya bundooya ne balyoka batandika okubakuba nga bwe balaajana nga bwe batakyaddamu kubba kyokka nga buteerere abatuuze baswakidde.

Ow’ebyokwerinda mu muluka gw’e Luwafu Mw. Vincent Muwonge muliraanwa wa Balaba yategeezezza nti mukazi we eyakedde okutegeka omwana agenda ku ssomero ye yalabye omusajja ng’awalampa ekikomera n’amuzuukusa.

Ate ye owa LC Lauben  Ssempijja yategeezezza nti  guno si gwe mulundi ogusoose ng’abavubuka abo bakwatibwa mu bubbi.