TOP
  • Home
  • Amawulire
  • ‘Gavt. etegeke abaserikale ba miritale bakuume obululu mu kulonda kwa 2011’

‘Gavt. etegeke abaserikale ba miritale bakuume obululu mu kulonda kwa 2011’

Added 23rd August 2009

Ahmed Mukiibi akutuusaako ebyateeseddwa mu pulogulaamu eno eyakubiriziddwa Terah Kaaya:

Charles Lubogo owa FDC: Bwe tubeera twogera ku by’okulonda bannayuganda beesisiwala emitima olw’emivuyo n’obubbi obubaddewo era tetwagala muntu yenna kubibalaatiramu.   Akakiiko k’eb

Ahmed Mukiibi akutuusaako ebyateeseddwa mu pulogulaamu eno eyakubiriziddwa Terah Kaaya:

Charles Lubogo owa FDC: Bwe tubeera twogera ku by’okulonda bannayuganda beesisiwala emitima olw’emivuyo n’obubbi obubaddewo era tetwagala muntu yenna kubibalaatiramu.   Akakiiko k’ebyokulonda tetukalinaamu bwesige kubanga Dr. Kiggundu  akakulira Kaada wa NRM era yeesimbawo mu 1996 e Lubaga  n’awangulwa Lukyamuzi. Omuwandiisi w’akakiiko Sam Rwakoojo naye muntu wa NRM wa munda. Tulabula omuntu yenna alina enteekateeka ey’okuzannyira mu kalulu ka 2011 ave mu kakiiko k’ebyokulonda ng’obudde bukyali.

Dan Mugume Rwakajara wa NRM: Nsaba abantu b’oludda oluvuganya  bayimirirE ku magulu abiri bakkirize nti tugenda kubawangula  mu 2011, tetwagala batandiike kukaankana, bave mu kusattira. Abaana ba FDC abeekalakaasizza  baabadde tebawera mukaaga. FDC balina ebifo bye baawangula wano mu Kampala nga Kiggundu ye ssentebe w’akakiiko, lwaki Kiggundu teyababba. Pulezidenti alina obuyinza era bumuweebwa Konsitityusoni okulonda akakiiko k’ebyokulonda. Singa Pulezidnti yali abba akalulu yandibadde awangulira mu bitundu 80 ku 100.

Willy Senkuba wa SDP: Tuli mu nfuga ey’ebibiina ebingi, ekitegeeza nti buli kibiina kyandibadde kikiikiirirwa ku kakiiko k’ebyokulonda. Nze nnenya Palamenti yaffe kubanga yalemwa okukyuusa mu Konsitityusoni okuggya ku Pulezidenti Museveni obuyinza obw’okulonda akakiiko.  Naye ababaka baffe tebafaayo so nga  baandibadde bakikola nga tannafuna kisanja kya kusatu. Kikulu nnyo abantu okufuna Densite z’eggwanga okwewonya Abanyarwanda, bannakenya, Abasudani n’abagwiira abalala abeetaba mu mu kulonda  kwaffe. Toyinza kuleeta Yinginiya eyasoma okuwayalinga ebisaawe by’ennyonyi  n’okuzimba ebizimbe n’omuwa okukulira ebyokulonda! twetaaga omulamuzi amanyi ku mateeka

Kigongo Sentongo Mutalebani owa NRM: Omukyala takulema  kufunisa lubuto n’onenya ekitanda! Ab’oludda oluvuganya bali mu Kampala gye balwanira mu byalo tebaaliiyo. Ffe aba NRM kye tuva tubawangula.  Museveni awangaale, alimuleegamu embazzi ndigigaaya.

Rukundo Afrika: Nneebaza Pulezidenti Museveni olw’obukulembeze bwe era eggwanga lyaffe alina waalituusizza tusiima. Kiggundu akoze omulimu munene wabula ekizibu ky’alina, ze ssente obutatuuka mu budde. Tusaba gavumenti emuyambe emuwe ssente mu budde. Abavubuka mbagamba nti tukole twegye mu bwavu. Eby’okumala ebiseera mu kwekalakaasa mu biveeko. Ekizibu kya Uganda si Museveni wabula bwavu.

Janet Ntabobwa wa NRM: Ab’oludda oluvuganya balinga omuntu agudde mu mazzi, bapapalapaapaala. 2011 tugenda kubakuba n’akajjanja kabaggwe.

Jethro Nuwagaba: Ffe aba FDC twatuula n’ebibiina ebirala ne tuwandiika enkyukakyuka ezeetaagibwa mu byokulonda. Ebintu bye twagala bissibwe mu mateeka g’ebyokulonda twabirambika bulungi okugeza, twetaaga  enkyukakyuka  mu kakiiko k’ebyokulonda. 

Kituufu Konsitityusoni  ewa Pulezidenti Museveni obuyinza okulonda akakiiko k’ebyokulonda naye ekyo kyassibwa mu Konsitityusoni ya 1995 nga Uganda eri ku nfuga y’ekibiina ekimu. Wabula okuva lwe twava mu nfuga y’omugendo, kati tuli ku nfuga y’ebibiina ebingi  era tulina okukyusa mu Konsitityusoni, okulongoosa ebyasoba. Ggwe owa NRM leero muli mu buyinza kyokka enkya ojja kuba ku ludda oluvuganya noolwekyo twagala wabeewo obwenkanya. Mu nkyukakyuka ze twasaba, twagamba nti amagye gakomye okweyingiza mu byokulonda. Twebuuza lwaki abajaasi ba UPDF kkumi abali mu Palamenti batuula ku ludda lwa NRM.

Mahab Janat: Tusaba Minisita Nasasira atusaasire ffe ab’oku luguudo lw’e Busaabala  atukolere ku luguudo lwaffe. Nsaba abantu nga Nuwagaba, musooke mudde mu byaalo kubanga ekizibu tebuli ku Ying. Kiggundu. Nze nnali nnondesa e Busaabala kyokka nga aba FDC tebalinaayo bantu kubala bululu bwabwe. 

Aba FDC balowooza nti obululu buli mu Kampala ne bamala ebiseera wano mu Kampala ne beerabira nti akalulu balina kukayigga mu Uganda yonna si Kampala.  Nsaba ababaka baffe aba Palamenti bayise mu bwangu ssente ez’okusomesa  ebyokulonda kubanga obululu obwafa mu kulonda kwa 2006 businga  obw’abantu abeesimbawo nga Ssebaana Kizito. Nsaba gavumenti effeeyo okukubisa ne densite z’eggwanga.

Musa Nadduli Mpiima: Akakiiko k’ebyokulonda kasaana okukyusibwamu, tulonde akakiiko akapya kubanga kano akaliwo kagendera ku ntoli za Pulezidenti Museveni. Buli kibiina kyetaaga okuweerezaayo abantu ku kakiiko kano.

Muzafar Kakooza:  Ying. Kiggundu si kaada wa NRM kubanga bw’aba yeesimbawo n’agwa tekimufuula mukyamu. Abantu bandibadde beebaza Kiggundu kubanga ku mulembe gwe, omuwendo Museveni kw’awangulidde gusse nnyo. 

Kituufu akakiiko k’ebyokulonda keetaagamu enkyukakyuka. N’ekirala omuntu bw’aba yeesimbyewo n’abba obululu, bwe gumusinga yandibadde takomawo. Akakiiko ka Kiggundu keetaaga okuweebwa ssente okusomesa abantu ebyokulonda kubanga abantu bangi tebamanyi kulonda  okugenza abamu bagenda ne bassa akayini ku Besigye,  ne baddira ku kafaananyi ka Museveni ne bawandiikakako nti, ‘twakoowa’. Ekyo ne kitta akalulu ke nga tamanyi. Abantu betaaga okumanya ebitta akalulu kaabwe.
Damalie Kibirige: Abantu beetaaga okujja wano okuteesa nga bamaze okusoma ku mateeka. Ekisooka ab’oludda oluvuganya balinga kkapa, bw’ebeera awaka n’otagiwa mmere edduka ate era balinga malaaya - awatali ssente tebeerawo.

Ab’oludda oluvuganya bakozi ba ssente era balina gye balya ssente. Engeri ab’oludda gye bali abakozi ba ssente, tebeetaaga kifo kyonna ku kakiiko ka byakulonda kubanga bajja kukulembeze ssente. Wabula ko akakiiko kasaana okwongera ku ssente ze bawa abakozi baako kubanga  bakeera nnyo okulondesa kyokka ne babawa omutwalo gumu gwokka!

Stella Tumuhairwe:  Kiggundu si y’abba akalulu. Obululu bwe bumala okukubwa bukwasibwa ba miruka. Ekyo kikyamu, akakiiko k’ebyokulonda keetaaga  okukozesa abakozi baako kubanga ab’oludda oluvuanaya bakozesa ab’emiruka ne babba obululu. Ffe ewaffe e Kamwenge FDC teriiyo  era NRM egenda kuwangula tevuganyziddwa. Aba FDC mbawa amagezi mudde mu byalo munoonye akalulu, Kiggundu talina buzibi.

Provia Kahenda:  Waliwo abatugamba nti bandyagadde Kiggundu agobwe kyokka beerabidde nti Pulezidenti Museveni alina obuyinza mu Konsitityusoni okulonda akakiiko era  asobola okusuula Kiggundu n’aleeta omuntu omulala omubi ennyo n’okusinga Kiggundu. Ab’oludda oluvuganya bagamba nti baagala kukiikirirwa  ku kakiiko naye ffe tugamba nti tetuyinza kuyoola kasasiro w’abooludda oluvuganya  tubayiwe mu kakiiko.

Nze nsaba gavumenti etegeke mu bwangu aba miritale Poliisi kubanga ab’oludda oluvuganya bali mu kweteekateeka kukola ffujjo, gavumenti yeetaaga okubeetegekera  nga bukyali, miritale ekube buli  aggyayo omutwe. Tewali ajja kusobola bantu ng’abo abatasobola kukunga abantu baabwe ne balowoolereza mu kukola effujjo okutabangula eggwanga lyaffe.

Francis Bbaale owa DP: Ow’ekitiibwa Sebaana Kizito abatumidde  n’abeebaza okuwagira DP. Tetusaana kwonoona budde nga tusaba Museveni okulonda akakiiko akalala kubanga  Museveni yatendekebwa Obote okubba obululu. Obululu basinga kububbira mu State House so nga n’amagye galonda emirundi gye gaagala  naddala ku Summit View.

RDC Katenda Luutu: Akakiiko k’ebyokulonda akaliwo kati Pulezidenti yakalondera mu mateeka kubanga  obuyinza bumuweebwa mu Konsitityusoni. Singa tugenda n’okusaba kw’ab’oludda oluvuganya nti nabo bakiikirirwe, bajja kutuuka n’okusaba babalondera abalamuzi baabwe.

Twetaaga mu kulonda okuddako wassibwewo abakuumaddembe ab’enjawulo kubanga aba Poliisi  abaliwo bano aba FDC babayisaamu amaaso. Akakiiko k’ebyokulonda nze nnandyagadde kasomesa abantu eby’okulonda ng’obudde bukyali n’okutimba enkalala z’abalonzi. Ekirala n’abaami b’emiruka nabo beetaaga okuggyibwa mu by’okulonda kubanga nabo ba byabufuzi.  Kiggundu si kaada wa NRM kubanga we yeesimbirawo mu 1996 tewaaliwo NRM, Uganda yali ku nfuga ya mugendo. 

Lutwama Afrika: Nze nnandgyagadde ab’oludda oluvuganya gavumenti ebawe ssente okuddukanya ebyokulonda kwabwe kubanga abamu bafuna ssente okuva mu balabe ba Uganda. Nnandisabye wabeewo eggye ekkambwe nga tugenda mu kulonda kubanga abaana ba FDC baabadde baagala kutta Ying. Kiggundu.

Kyasaliddwaawo, eggye lya Miritale okubaawo. Tetujja kukkiriza ttemu mu kulonda kuvumaganya NRM. 

Ibrahim Kyabaggu Mugenyi Asooka: Mbagaliza ekisiibo ekirungi. Obuzibu bwa Uganda si kakiiko ka byokulonda. Pulezidenti wa ddembe okulonda  akakiiko k’ebyokulonda kubanga obuyinza abulina. Ab’oludda oluvuganya tulina okuddayo okutema empenda  engeri ekibiina kyaffe ekya DP  gye kigenda okutwala obuyinza mu 2011.  Kati aba FDC beerippye ku Olara Otunnu beerabidde amaziga UPC  ge yakaabya bannayuganda. Bwe tuteetereeze, Museveni ajja kutuwangula nnyo. Nsaba Kiggundu okussaawa okusomesa eby’okulonda akakakase  n’abantu nti ajja kutegeka okulonda okw’amazima.

 Jibril Sebuggwawo: Okukyukyusa akakiiko k’ebyokulonda si kye kikulu wabula mmwe abeesimbyewo kye mulina okukola kunoonya bululu obubasobozesa okuwangula. Okugeza twali e Kyaddondo North mu kunoonya akalulu ka Kasule Sebunnya kyokka bannaffe bwe twali tuvuganya baali mu kukwata bakazi! Nsaba gavumenti esseewo Miritale okukuuma obululu mu 2011 kubanga  y’ejja okusobola bano ab’oludda oluvuganya okubamalamu essagaliko.

Margaret Namwanje:  Kiggundu talina musango gwonna, wabula nsaba gavumenti esengejje ab’emiruka kubanga mulimu abakyamu. Ndabula abavubuka  abali wano nti temwalaba byaliwo mu kulonda kwa 1980, kati muli mu kukola effujjo. Mwagala kutuzza mu mivuyo. Eno gavumenti yassaawo enkola y’okubala obululu mu lujjudde ekitaaliwo ku mulembe gwa Obote.
Kitikyamuwogo: Twagenda mu nfuga ya bibiina, n’olwekyo twetaaga ab’ebibiina ebirala nabo bakiikirirwe ku kakiiko kano.
John Misindye owa UYD: Buli lwe tumala okukuba obululu, wabaawo okutambuza obubookisi bw’obululu kyokka ab’akakiiko k’ebyokulonda tebalina mbeera ebasobozesa kukuuma kalulu nga katambuzibwa.

Awo obululu oluusi we babubbira. Ekirala abaami b’amagombolola   tetwagala  beenyigire mu bya kulonda kubanga balina kyekubiira olw’okuba balondebwa gavumenti.

Okugeza mu kalulu ke twalimu e Goma, abaami b’amagombolola baatulondera abantu abagenda okulabirira ebyokulonda be tumannyidde ddala nti babbi ba bululu. Ssentebe w’akakiiko k’ebyokulinda asaana okukola ekisanja kimu kyonna
Nakajigiri Kyeyune: Kiggundu talina musango gwonna. Abalonzi mwe mucankalanya ebyokulonda.  Ekirungi ffe aba NRM tumanyi kyetwagala, Museveni ky’ava awangula. Nnammwe aba CP, DP muyige  okukuuma akakulu kammwe. Bino eby’okusomesa ebyokulonda byakumala biseera kubanga  omuntu atakwata ne bw’omusomesa otya nga takwata obeera otawaanira bwereere.
Moses Kaziba: Kyannaku nnyo bannaffe bano aba DP tebamanyi nti Sekkono eyali ssentebe w’akakiiko k’ebyokulonda si ye yalangirira ebyava mu kulonda wabula yali Paulo Muwanga.

Besigye yeerabidde nti ekyamusuula, yalemwa okufuna abantu okukuuma obululu bwe. Mu kifo ky’okukyusa amateeka, Museveni agobe Kiggundu olwaleero, alonde Besigye, Bidandi Ssali, Sebaana ne Bwanika  baweere. Bano bannaffe balina ekirwadde, baalufuula luyimba nti batubbye naye singa Museveni abalonda ku kakiiko, tujja kuwulira kye bagamba
Maama Kyama ow’e Ndejje: Ying. Kiggundu talina musango kubanga ye atuula awo ebintu ne bimusanga ku kompyuta n’abirangirira. Aba FDC okwekalakaasa baatuyambye okumanya nti basobola okukuba Poliisi era ffe twafunyeemu ekyokuyiga nti tulina okunyweza ebyokwerinda ng’okulonda kwa 2011 tekunnabaawo. Ab’ebibiina amagezi mbawa  ga bwereere, munoonye engeri gye munaayimba oluyimba lwammwe olwa batubbye. Kiggundu musaba asomese abantu ku ngeri ey’okulonda.
Ying. Katumba:  Museveni musaba nti okuva akakiiko k’ebyokulonda lwe kaakasingisibwa emisango  by’ebyokulonda ku nfunda eziwera, abantu abo be yakomezzaawo baabadde beetaaga okukyuusa. Nga tetunnayiwa musaayi nga bwe kyali mu Kenya ne Zimbabwe, kyetaagisa  okukyusa mu mateeka ng’obudde bukyali.

Muhammad Seggirinya: Museveni yatugamba nti obuyinza buli mu bantu, lwaki Pulezidenti Museveni atukakaatikako omuntu gwetutaagala. Kino kitegeeza nti Museveni awagira ebintu Kiggundu byazze akola. Museveni tumugamba nti bw’aba tasobola kuggyawo kakiiko ka Kiggundu, ebyokulonda abaggyeyo. 

Muhammad Mutaasa:  Bannayuganda balina okukimanya nti  akakiiko k’ebyokulonda bwe kanaaba tekakyusiddwaamu kubeerako ba ludda luvuganya, tewajja kuba mirembe. Omuntu bw’aba yabba obululu , omusango ne gumusinga, lwaki addamu okwesimbawo.

Michael Kayihura: Ying. Kiggundu ng’omuntu talina musango. Omuntu bw’aba yeesimbyewo, kkooti n’esalawo nti akalulu yabba kabbe, taddamu kukkirizibwa kwesimbawo. 

Nsaba Kiggundu avveeyo akakasa eggwanga nti ebintu abirangirira nga bwe bivudde mu kulonda. Nsaba gavumenti eno yeekube mu kifuba,  addeko ebbali naffe ba Michael Kayihura tufugeko.

Yowasi Baguma: Pulezidenti Museveni nkusaba atufuge nga Gadafi bw’afuga Libya. Ssebo tufuge okutuusa lw’olifa, bano bavveeko, nze ndi mubuulizi  wa njiri,  nkutongozza ssebo Pulezidenti towuliriza bano, ffuga Uganda okutuusa lwolifa.


Ttabamiruka atuula buli Lwamukaaga okuva essaawa ttaano okutuuka ku munaana. Naawe oyanirizibwa okujja n’owa endowooza yo.


 

‘Gavt. etegeke abaserikale ba miritale bakuume obululu mu kulonda kwa 2011’

More From The Author

Emboozi z’omuwandiisi endala

Emboozi endala

Lubega akulembedde ne Amatos ku kkooti e Makindye.

Abaali bafera paasita basin...

ABASUUBUZI b'omu Kampala basindikiddwa mu kkomera lwa kugezaako kufera Paasita ssente ezikunukkiriza mu buwumbi...

Spice Diana asiibuludde aba...

Bya Mukasa Lawrence  ABAYIMBI okuli Spice Diana ne munne Fik Femaika bavuddeyo ne baduukirira abasiraamu ku...

Abakozi ba Rock bavudde mu ...

Bya Phoebe Nabagereka Abakozi mu kampuni ya Roko e Gerenge mu town council ye Katabi bekalakasiza nga balaga...

FDC evumiridde effujjo erik...

Bya Doreen Namaggala AMYUKA ssabawandiisi w'ekibiina ki FDC, Arnold Kaija asabye bannayuganda okukomya okutiisatiisa...

Abazigu balumbye ekigo ne b...

Abazigu ababadde n'ebijambiya, emitayimbwa saako ennyondo bazinze ekigo kya Kabulamuliro Catholic Parish, ne bamenya...