Bya Ssennabulya Baagalayina
OMUKAZI omufumbo atuyaanidde ku Poliisi e Lukaya mu Kalungu gy’atwaliddwa aginnyonnyole ku by’omwana wa muggyawe eyasangiddwa ng’abunye amabwa omubiri gwonna.
Mariam Nakyejjwe yakwatiddwa olw’ebigambibwa nti alina ekkoobaane ne bba Amuri Ssemuyaga okubonyaabonya omwana Fahad Mubiru ow’emyaka esatu ng’ono poliisi w’emugwiiriddeko ng’akubiddwa bubi n’okwokebwa omuliro.
Mubiru yabadde n’ebiwundu by’omuliro ku mikono, ebigere n’omugongo ng’abazirakisa be baatemezza ku poliisi ku ngeri abazadde bano gye baamutulugunyaamu wabula omukazi n’agiremesa okukwata bba.
Omukazi bwe yatuusiddwa ku Poliisi yagambye nti omwana kitaawe yennyini y’amutulugunya ng’amukuba buli lunaku nti ayonoona ku buliri era olulala yamukuba n’azirika.
Mu kiseera kye kimu Poliisi etubidde n’abaana basatu okuli n’ayonka abaasuuliddwawo nnyina nga kigambibwa nti abadde atambula nabo ng’abasuza mu nsiko.
Omuduumizi wa Poliisi mu Kalungu, SP Martine Okoyo yategeezezza nti abaana abasatu okuli Sauda Namatta, Malusi Nawangi ne Adam Kyaterekera baazuuliddwa omuzirakisa Hussein Kayizzi.
SP Okoyo agamba nti Kayizzi yabategeezezza nti abaana baasuuliddwa ku kyalo Mukoko ekiri mu Ggombolola y’e Bukulula.
Omwana wa muggyawe amukwasizza
