Bya Deborah Nanfuka
MUNNAYUGANDA akolera e Juba akiguddeko bwe bamuguddeko ekiyiifuyiifu ne bamulaawa nga bamulumiriza nti baamusanze asinda omukwano n’omukazi Omudinka nga muka musajja.
Ssaalongo Fredrick Kayondo nga mutuuze wa mu Ndeeba okumpi ne Kampala, musuubuzi e Juba. Mu Sudan gy’akolera yagenda ne mukazi we ayitibwa Night Nakiguli kyokka bwe yatuuka eyo n’akwanayo omukazi omulala Omudinka gw’abadde apepeya naye.
Kayondo annyonnyola nti yagenze ku mulimu nga bulijjo n’annyuka n’adda awaka. Wabula yabadde atuuka awaka, n’asanga abasajja abaamutaayizza mu kavuvung’ano kano n’abeesimattulako n’adduka. Baamugobye nga beeyambisa bodaboda okutuusa lwe baamukutte.
Baamukubye akabaawo ku mutwe n’agwa wansi n’azirika kwe kumuggyamu empale ne bamulaawa.
“Okunsala kwonna nakuwulidde era nawulidde nga bansikamu ensigo zombi kyokka nga nfa obulumi nga tewali annyamba,” Kayondo eyasangiddwa ku kitanda e Mulago, gye yaleeteddwa okuva e Juba, bwe yattottodde.
Yagambye nti abasajja baamulaaye ku ssaawa nga musanvu ogw’ekiro kyokka teyafunye buyambi okutuusa obudde lwe bwakedde. Bannayuganda abaabadde bayita mu kifo kino ekiyitibwa Mawona mu kibuga Juba, be baamuyoddeyodde ne bamutwala mu ddwaaliro ly’e Juba gye bamuggye ne bamuleeta e Mulago gy’ajjanjabirwa mu kiseera kino.
Kayondo agamba nti omukazi eyamulaayisizza yamufuna muwala muto era yamuggya mu bazadde be abaamumuwa mu butongole kyokka yeewuunyizza okuwulira nti omuwala abaddeko omusajja omulala eyatuuse n’okwekobaana ne banne ne bamuteega ne bamulaawa.
Wabula Kayondo yagambye nti wadde agudde ku kizibu kino, abadde alina abaana basatu mu mukyala we Nakiguli ate nga yawulidde nti n’omukazi Omudinka yali amufunyisizza olubuto nga naye yazadde.
Omusawo omukugu e Mulago Dr. Charles Kasozi yannyonnyodde nti Kayondo takyaddamu kuzaala era n’amaanyi g’ekisajja gaakendeeredde ddala.
Kayondo agamba nti mukazi we yamuleseeyo e Juba okutwala mu maaso bizinensi yaabwe kyokka n’asaba abazirakisa okumuyambako ku nsimbi z’eddwaaliro nga baziyisa ku ssimu 0785659407.
Bamukutte n’omukazi e Juba ne bamulaawa
