Bya Joseph Mutebi
ABANTU 364 abagambibwa okuteega abatuuze b’e Kamwokya, Kyebando n’emiriraano ne babakuba obutayimbwa n’amasasi poliisi ya Kira Road ebazingizza n’ebayoola.
Alex Edunyu aduumira poliisi ya Kira Road, ye yakulembeddemu ekikwekweto kino ekyabaddewo ku Lwokuna okuva ssaawa 2:00 okutuuka 5:00.
Kyaddiridde okufuna amawulire nti abantu abakuba obutayimbwa ekiro, okufumita ebiso, okusobya ku bakyala n’okunywa enjaga bakeera kukung’aanira mu bifo mwe bakubira amatatu ne ppuulu.
Edunyu yayambiddwaako akulira poliisi y’e Kisaasi, Mohammed Kirumira ne bazingako ebyalo okuli Kyebando, Kamwokya, Central zooni, Mulimira, Nsoba, Katale, Kibinika ne bayoola abantu bano.
Poliisi yabadde n’emmotoka ezaasusse mu ttaano yayambiddwako abakulembeze b’ebyalo bino obwedda ababalaga abantu abatalina mutawana n’abayaaye.
Edunyu yategeezezza nti bakyagenda mu maaso n’okwekenneenya abaakwatiddwa baggyemu abatalina misango abalala batwalibwe mu kkooti y’e Matugga bavunaanibwe.
Yagambye nti ababbi tebagenda kuddayo kutta muntu mulala mu kitundu kino nga yaduumira poliisi eno era ebikwekweto bigenda kukolebwanga misana na kiro.
Abatigomya Kampala 364 babayodde
