Omukazi wa Paasita acweriirwe kukomwa amagara ge ahabw’okwita.

N’ebya Charles Kakamwa                          

JINJA

Omukazi wa Paasita omu disiturikiti eya Jinja acweriirwe kukomwa amagara ge ahabw’okusingisibwa omushango okukusa abaana n’okwita omwana w’omwishiki w’emyaka 4 Isabella Trinity Nakisuyi, omu mwaka gwa 2021.

Felisita Namaganda, 30, asingisiibwe emishango egi omu maisho g’omuramuzi wa kooti enkuru eya Jinja ebaire ekuriirwe, Justice Winfred Nabisinde aharwakana.

Aha mushango gw’okukusa abaana, Namaganda acweriirwe kukomwa emyaka 30 omu kihome kandi aha mushango gw’okwita ahairwe ekifubiro ky’okukomwa amagara ge goona. Beitu, hoona omuramuzi agizire ngu ebifubiro 2 ebimuhairwe naija kubikora mukono gumwe, Omuramuzi arikushoborora.

Arikuhayo encwamu ye aharwakana, Omuramuzi Nabisinde agizire ngu obuhame oburetsirwe omu kooti ab’orubaju oruhababi nibumara kwomesereza Namaganda ngu akaakora emishango egi.

Namaganda hamwe n’omushaija we, Paasita Joseph Serubiri ow’ekanisa ya Deliverance and Healing Ministries Church omuri Kakira omu disiturikiti eya Jinja bakakwatwa bwanyima y’okubura kwa Nakisuyi owaizire akaitwa ahabiro 30/009/2021.

Na bwanyima, Pooriisi ekakwata ondiijo nyakuteekateekwaho Paasita Buyinza Isma Sekabira orikumanywa nka Israel, Paasita mukuru aha kanisa ya Deliverance and Healing Ministries Church omuri Ganda, Nansana omu disiturikiti eya Wakiso bwanyima ya Serubiri kugira ngu akaba nakora aha kuragira kwa Buyinza.

Omu kwezi kwa 8, 2023, Omuramuzi Nabisinde akacwera Serubiri kukomwa emyaka 30 omu kihome ahabw’okukusa abaana hamwe n’okukomwa amagara ge goona ahabw’okwita Nakisuyi bwanyima y’okwikiriza omu kooti ngu akakora emishango egi.

Beitu hoona, n’obu Serubiri yayikiriize okukora emishango egi, abu yabaire najunaanwa nabo abarimu omukazi we Namaganda na Sekabira bakehakana emishango nikwo kutandika kuhozesibwa kuhisya ahi basingisiibwe emishango egi.

Akakyoreka ngu ahabw’okutuura omu kicweka eki, omwishiki akaija yamanyira Namaganda kandi tihaine owabaire namanya ngu Namaganda nabaasa kuhisyaho omwana ogu akabi.

Beitu hoona, naagira ngi omu bigambo bya Serubiri yaheza kukwatwa akagira ngu akatunga okworeka kuhoonga omwana ogu Kwenda ngu atungye obugaiga, akagambiraho Namaganda owamwikiriize kukora ekikorwa eki.

Nabwo akayikiriza ngu akatemaho omwishiki ogu omutwe omunda y’ekanisa yaabo omu kyaro ekya Market Cell omuri Kakira kandi ngu omukazi we akamuhweraho kuguma nareebareba buri hamwe kureeba tihagira owabareeba.

Na bwanyima, Namaganda nagambwa kuba yatwire ebisigarira by’omwana omu kaveera ka kyenju (green) nikwo kubiziika omu kyari kya Wanyange Lake.

Omuramuzi Nabisinde nabwo naagira ngu Serubiri akagambira Namaganda ngu yayita omwana kandi atagira omuntu weena omu b’obushoborozi ou yagambira.

Beitu hoona, kooti erekwire Paasita Buyinza owa Deliverance and Healing Ministries Church omuri Ganda, Nansana bwanyima y’abajurizi kuremwa kureeta obujurizi bw’okumwomesereza ngu akakora omushango ogu.

“Ninyikiriza n’aba court assessors ngu Buyinza tarayejumbire omu kukora emishango egi. Nahabw’ekyo, namurekura kandi namwihaho emishango yoona 2 ei abaire najunaanwa, okwihaho yaheza kukwatirwa omu mishango endiijo,” Omuramuzi arikushoborora.

Paasita Buyinza abaire amazire emyaka 2 aha rumanda omu kihome kya Kirinya omuri Jinja.

#WestUpdates