TOP
  • Home
  • Amawulire
  • Ssebalamu annyonnyodde akakiiko k'ettaka ku Lwera

Ssebalamu annyonnyodde akakiiko k'ettaka ku Lwera

Added 5th October 2017

Ssebunya ne Ruhindi baamulemeddeko annyonnyole engeri gy’ayambamu eggwanga ng’atyoboola obutonde ne balaga okutya nti gye bujja n’oluguudo lw’e Masaka lwandibeera mu katyabaga.

 Omulamuzi Bamugemereire ( ku ddyo) ne Ssebalamu ( ku kkono) Ssebunya ne Ruhindi nga balambula Lwera.

Omulamuzi Bamugemereire ( ku ddyo) ne Ssebalamu ( ku kkono) Ssebunya ne Ruhindi nga balambula Lwera.

Bya S. BAAGALAYINA

OMUGAGGA w’omu Kampala John Ssebalamu alambuzza akakiiko akabuuliriza ku by’ettaka ekifo mw’alundira ebyennyanja n’okusima omusenyu mu Lwera. Ku Lwokubiri, akakiiko akakulirwa Omulamuzi Catherine Bamugemereire kaatandise okunoonyereza ku mivuyo gy’ettaka e Masaka gye kanaamala ennaku nnya.

Omulamuzi Bamugemereire n’abaakakiiko ke okuli Robert Ssebunnya ne Fred Ruhindi baasoose kusisinkana bakulembeze b’e Kalungu n’aba Lukaya Town Council ku Lwokubiri.

Wano we baavudde okugenda mu Lwera beetegereze bye baabadde bategeezeddwa nti abagagga boonoonye obutonde bw’ensi naddala nga bayita mu kusima omusenyu.

Akakiiko era kaayagadde okumanya bannannyini byapa n’engeri gye baabifunamu ku ttaka ly’olutobazzi.

Abakulembeze b’ekitundu kwabaddeko RDC Hajji Abubaker Lubega Kaddunnabbi, amyuka CAO Fredrick Balemeezi n’avunaanyizibwa ku butonde bw’ensi Richard Vvube ne Meeya wa Lukaya Gerald Ssennyondo.

Olwatuuse mu Lwera, Ssebalamu baamusanzeeyo ne bamussa ku nninga abannyonnyole engeri gye yafunamu ebyapa by’obwannannyini ku ttaka ly’entobazzi.

Ssebalamu yannyonnyodde nti ettaka yalifuna mu mateeka era n’ekitongole kya NEMA kimanyi by’akola.

N’agamba nti ebinnya mw’asima omusenyu abirundiramu ebyennyanja. Kyokka akakiiko tekaamatidde bye yakannyonnyodde naddala bwe yagambye nti ettaka ly’olutobazzi n’ettaka eddala lyonna Katonda yalissaawo kuyamba bantu be. Era kino kyennyini ky’akola ng’ekigendererwa ekikulu kuyamba ggwanga.

Ssebunya ne Ruhindi baamulemeddeko annyonnyole engeri gy’ayambamu eggwanga ng’atyoboola obutonde ne balaga okutya nti gye bujja n’oluguudo lw’e Masaka lwandibeera mu katyabaga.

Wano Ssebalamu yabannyonnyodde nti okugenda mu Lwera yasanga waliwo ebyapa by’ettaka lya mayiro nnamba ku katale n’abisasula.

Era talabawo musango gwe yazza.

Kyokka akakiiko ne kamubuuza oba nga bw’asanga ennyama y’abantu ku mudaala asasula busasuzi?

Ssebalamu yategeezezza nti ettaka ku ludda olw’e Mpigi lyamuguzibwa ng’ebyapa biri mu mannya ga Mayanja Nkangi.

Ate eriri mu Kalungu lyamuguzibwa Minisita w’ebyobulimi Vincent Ssempijja.

Mu ttaka lino mwe yasangiddwa ng’asima omusenyu.

Ssebalamu yannyonnyodde nti ebitundu mw’asima omusenyu byalambulwa aba NEMA n’akakiiko k’ebyettaka mu ggwanga ne bamukkiriza okukola.

Wano akakiiko kaakyukidde owa NEMA atwala Kalungu, ayitibwa Vvube gwe baakazizza lwaki ng’omukungu wa Gavumenti aliwo okutaasa n’okukuuma obutonde teyawabula Ssebalamu nti ekifo w’akolera akirimu mu bukyamu.

Vvube yeerwanyeko nti wadde alina obuvunaanyizibwa obwo naye Ssebalamu alina ebyapa n’ebiragiro ebyamuweebwa akakiiko k’ebyettaka mu ggwanga gattako okuva mu bakama be aba NEMA.

Wabula Vvube bwe baamulemeddeko kwe kukyusa n’agamba nti ekitundu gye baabadde kitwalibwa Mpigi ye avunaanyizibwa ku Kalungu.

Bamugemereire yeewuunyizza lwaki Ssebalamu assa ebikomera okuli enzigi ez’amaanyi mu Lwera ng’agendayo asooka kuggulirwa.

Ssebalamu yayanukudde nti gano matwale ge gy’akolera bizinensi okuli okulunda ebyennjanja ebyetaagisa obutaleka buli omu kusaalimbirayo.

More From The Author

Emboozi z’omuwandiisi endala

Emboozi endala

Abaana nga bagumbye ku

Bakubye ssengaabwe mu mbuga...

ABAANA batutte ssengabwe mu kakiiko k'eggombolola y'e Kyazanga nga bamulumiriza okubawuddiisa ne yezibika obukadde...

Komakech n'ebizibiti bye ku poliisi y'e Kawanda.

Abadde yakayimbulwa e Luzir...

Komakech ategeezezza nga bwabadde agenda okufa enjala nga yali asiiga njala z’abakazi wabula okuva bwe bayimiriza...

Testing video to see if it ...

aojdjadjdadojajdndn

Omusajja yansuulawo ng'omwa...

Nze Scovia Twetise 28, mbeera Bulamu-Gazaya, Texas. Mu 2005, nalina emyaka 15 omusajja yantuukirira n’ahhamba nti...

Eyagenda okusoma ddiguli e ...

Talina mpapula kw’akolera era agamba tasobola kudda kubanga bw’adda taddayo