4 bakwateirwe okwita ceeyamaani LCII omuri Isingiro.

N’ebya Fred Turyakira

ISINGIRO

Abantu 4 bakwatsirwe ahabw’okugambwa kuba baitsire ceeyamaani w’omuruka gwa Nyamisindo omu gomborora ya Masha omu disiturikiti eya Isingiro.

Samson Kasasira, Omugambirizi wa Pooriisi ahabw’ekyanga ekya Rwizi naagamba omugyenzi nka Ben Byenyinemwe, 64, orikugambwa kuba aitsirwe ebiro 22/10/2023.

Kasasira naagira ngu abakwatsirwe barimu; Kiconco Sylivia, 56- omukazi w’omugyenzi, abatabani 2 Katushabe Aloysius, 40 na Yebuuze Ronald, 33 hamwe na Tukwatanise Moses, 30 muriraanwa wa Yebuuze.

Kasasira naagira ngu Pooriisi ya Masha ahabiro 22/10/2023 shaaha nka 6 z’ekiro etungire amakuru kuruga ow’omuhandiiki w’eby’okwerinda ahabw’omuruka gwa Nyamitsindo omanyirweho erya Kato ryonka arikumanyisa Pooriisi ahakwitwa kwa ceeyamaani w’omuruka ogwo.

Naagira ngu Pooriisi eyoheeriize aba Pooriisi baayo kuza aha mwanya abagyenzire n’embwa ya Pooriisi ekangiirizi. Aba bashangire omutumbi gw’omugyenzi aha kitanda kye guri omu kyagaana ky’eshagama guteematemire aha maraka.

Okurugiirira aha mukazi w’omugyenzi, abainazi bataahiriire omushaija we obu abaire ari omu sitoowa. Nikigambwa ngu abainazi ababaire bari 3 bashohoize omukazi omunju nikwo kusiga bamuteera batyo bakagyenda.

Embwa ya Pooriisi ehikire aha mwanya ogu ceeyamaani aitiirweho nikwo kubatwara omu kyaro kya Nyakagyera omu gomborora eya Kabingo, kiromita 10 kuruga ahi omugyenzi aitiirwe. 

Embwa etaahire omunju ya mutabani w’omugyenzi, Yebuuze Ronald nikwo kweyongyerayo ekaza omunju ya Tukwatanise Moses, muriraanwa wa Yebuuze.

Okurugiirira aha byahikireho kuruga omu kucondooza, ceeyamaani n’omukazi we bakagira obuteikirizana bwanyima y’omugyenzi kushwera omukazi wa kabiri ekyaretsireho emihondano omu famire.

Omugambirizi wa Pooriisi, naagira ngu omutumbi gwa ceeyamaani gwihirweho gwatwarwa omu kabafu ah’eirwariro erihango erya Mbarara kukyeberwa kandi abakwatsirwe bari omu kihome kya Pooriisi kuhweraho omu kucondooza.

#WestUpdates