TOP
  • Home
  • Amawulire
  • Eppeesa erisaanyaawo Amerika lindi mu ttaano - Kim owa N. Korea

Eppeesa erisaanyaawo Amerika lindi mu ttaano - Kim owa N. Korea

Added 2nd January 2018

PULEZIDENTI wa North Korea, Kim Jong Un agambye nti eppeesa erinasula bbomu ya Nukiriya yalisembezza ku mmeeza kw’atuula era abamusosonkereza ekyo balina okukimanya.

 Kim Jong Un, owa North Korea ng’ayogera eri bannansi bwe yabadde ku ttivvi y’eggwanga.

Kim Jong Un, owa North Korea ng’ayogera eri bannansi bwe yabadde ku ttivvi y’eggwanga.

Yalabudde Amerika nti bw’eyongera okubacookooza eyinza okwejjusa kubanga asobola okubakola kye balifa tebeerabidde.

Yagambye nti buli kaseera atunuulira eppeesa eritulisa bbomu nnamuzisa n’alowooza okulinyiga asaanyeewo Amerika n’amawanga amalala kyokka ekisa ne kimukwata n’abaleka bagira beemoola.

Wabula n’alabula nti akadde k’okumwemoolerako kagenda kaggwaayo.

Yagambye nti ssinga bongera okumusosonkereza, waakulinyiga abakakase nti Amerika tesobola kumuggulako lutalo n’eruwangula. Kim bwe yabadde awa obubaka bw’omwaka omuggya 2018 era yasinzidde ku ttivvi y’eggwanga n’agamba nti bw’afunya ekikonde, Amerika agirabira mu kikonde kye era teyinza kumutiisa.

Pulezidenti wa Amerika Donald Trump yabadde ayingira Mar-a-Lago Resort mu kibuga Florida ne bamutegeeza Kim bye yayogedde era yasoose kuseka mu ngeri ey’okulengezza n’agamba nti “tujja kumulaba”.

Kyokka oluvannyuma yagambye nti ebigambo bya Kim tebabitunuulira nga bya lubalaato kubanga ye muntu gwe balaba ng’asobola okukola ekintu kyonna nga talowoozezza ku biyinza kuvaamu.

Kim olwamaze okulabula Amerika, n’adda ku South Korea n’agamba nti asobola okukkiriza ne bafunawo enteeseganya basobole okukolera awamu kyokka tayinza kukkiriza kwogera ne South Korea ng’awalirizibwa ejjoogo lya Amerika.

Yasuubizza nti alina okuweerezaayo ababaka mu Februry mu Winter Olympics mu kibuga Seoul balabe kye bayinza okuzzaako.

W’aviiriddeyo okukkiriza okuteesa ne South Korea, nga wiiki ewedde Amerika yayitidde mu South Korea ne bawamba emmeeri eyabadde eva mu Republic of Panama ng’etisse amafuta ttani 5,100 ge yabadde ekukusa okugayingiza mu North Korea.

Wiiki ewedde Trump yatabukidde China ng’aginenya okuguza North Korea amafuta, ekintu ekikontana n’obukwakkulizo obuli mu nnatti ezaagissibwako ekibiina ky’amawanga amagatte.

Ebisasamaza ensi n’okutiisa Amerika, mu November omwaka oguwedde North Korea yafulumizza Mizayiro n’etegeeza nti basobola okusinziira ewaabwe ne bagikuba n’egwa e Washington DC mu Amerika.

Embeera eno evudde ku North Korea okujja ng’egezeza ebyokulwanyisa nnamuzisa mu kiseera ekiyise, ekitadde amawanga ag’enjawulo ku bunkenke ne gavaayo okugivumirira.

Mu November baagezesezza mizayiro Hwasong-15 esobola okubuuka mu bbanga mayiro 2,780 ekivvoola amateeka agafuga obwengula kubanga eno yakubisizzaamu emirundi 10 okusukka ekigero we balina okukoma.

Pulezidenti Moon Jae-in owa South Korea yagambye nti ekisuubizo ekyakoleddwa Kim okusindika ababaka mu Olympics kiyinza okubawaliriza okuyimiriza ku nteekateeka ze babadde nazo ne Amerika okulaba oba basobola okukozesa emmundu okumukkakkanya okutuusa ng’emizannyo gya Olympics giwedde.

Kim yagambye nti bwe kituuka ku nkolagana ya North Korea ne South Korea, awo asobola okukkakkanya ku ddoboozi ne basobola okwogera mu mirembe.

More From The Author

Emboozi z’omuwandiisi endala

Emboozi endala

RDC Kirabira ne ssentebe Matia Bwanika nga batema ddansi. EBIFAANANYI BYA PETER SSAAVA

CAO wa Wakiso atabaganyizza...

Akabaga kano akaabaddewo ku Lwokuna ku Maya Nature resort mu ggombolola y'e Nsangi e Wakiso, keetabiddwaako abakulira...

Omugenzi Sgt. Dick Magala

Abapoliisi abaafiiridde mu ...

GIBADDE miranga na kwazirana ku kitebe ky’ekitongole kya poliisi ekinoonyereza ku buzzi bw’emisango (CID) e Kibuli...

Ebimu ku bibala ebitwalibwa ebweru. Mu katono ye Kanyije.

Abatwala ebirime ebweru bee...

Abat wala ebirime ebweru w’eggwanga beemulugunya ku buseere bw’entambula y’ennyonyi ez’emigugu ng’ebisale byalinnyisibwa...

Ssentebe wa Luwafu B, Iga Gonzaga ng’annyonnyola abamu ku batuuze be ebyavudde mu kkooti.

Kkooti eyimirizza NEMA okug...

ABATUUZE b’e Kansanga abasoba mu 300 bafunye ku buweerero Kkooti Enkulu bw’efulumizza ekiragiro ekigaana ekitongole...

Abamu ku baffamire mu maka ga Maj. Mukasa e Kagoma.

Munnamagye eyayambako okule...

MUNNAMAGYE omulala, Maj. Gen. Eric Mukasa 60, eyakuba emmundu okuwamba enkambi y’e Kaweeweeta mu lutalo olwaleeta...