TOP
  • Home
  • Amawulire
  • Ekkanisa yalagajjalira ettaka lyayo - Maj.Gen. Nalweyiso

Ekkanisa yalagajjalira ettaka lyayo - Maj.Gen. Nalweyiso

Added 13th April 2018

MAJ. GEN. Proscovia Nalweyiso agambye nti ekkanisa ya Uganda yalagajjalira ettaka lyayo e Mukono. Era yeegaanye okukuma omuliro mu bantu okukola obulumbaganyi ku Balabirizi.

Maj. Gen. Nalweyiso mu kakiiko eggulo.

Maj. Gen. Nalweyiso mu kakiiko eggulo.

Yabadde mu kakiiko akabuuliriza ku mivuyo gy’ettaka n’ategeeza nti ekkanisa okusuulirira ettaka lyayo abantu ne balyesenzaako, kiringa Greenland Bank bwe yali yazimbibwa mu maaso ga Bbanka ya Uganda enkulu kyokka n’egwa! Nalweyiso yategeezezza nti yeewuunya olumu yali alaba ttivvi n’awulira omwawule ng’abuulira nti abo Banalweyiso balina ssente bagende banoonye awalala we bagula.

“Oweekitiibwa omulamuzi neewuunya oba ddala ebyo yali abisoma mu Bayibuli! Nze sirwanira ttaka era tolimpulira mu nkaayana za ttaka. Emyaka 63 gye nnina mbadde ku kibanja kya jjajjange era ndi mumativu,” Nalweyiso bwe yaggumizza.

Yasoose kunnyonnyola kakiiko nti ye ekibanja ky’alina kiriko yiika ttaano era alundirako enkoko 20,000/-, alinako ennyumba z’abapangisa era akikolerako enkulaakulana yonna esobola.

Nti kyokka ettaka ekkanisa ly’ekaayanira yalilekawo era terina nkulaakulana gy’erikolerako ky’ova olaba ng’abantu baalyesenzaako.

Bwe baamutegeezezza nti Rev. Dr. John Sennyonyi amyuka Cansala wa UCU (Uganda Christian University), yategeeza nti baali basimbye ebisagazi ku ttaka lino abantu abatiisatiisa ekkanisa okugigoba ku ttaka ne babisaawa ne babyonoona, Nalweyiso yabuuzizza kye baali basimbidde ebisagazi kubanga tebalina nte ze baali bagenda kubiriisa.

Omulamuzi Catherine Bamugemereire, akulira akakiiko yamubuuzizza oba amanyi ku nteekateeka y’ekkanisa nga bwe baategeeza nti bategeka kuzimbako mayumba n’ayanukula nti enteekateeka tagimanyiiko kyokka ettaka baaliragajjalira kubanga naye we yagendera mu lutalo yatambula ebitundu by’eggwanga ebyenjawulo n’amalayo ekiseera kyokka yagenda okudda ku kibanja kye, yakisanga nga bwe yakireka.

AYOGEDDE KU TTAKA LY’E NTAAWO

Nalweyiso yagambye nti enkaayana wakati w’Ekkanisa ne famire ya Ham Mukasa ku ttaka ly’e Ntaawo zaatandika mu myaka gya 2000.

Kino ekkanisa ebadde ekimanyi kyokka baasitudde eggye lya Yesu okugenda ku ttaka lye bamanyi nti liriko enkaayana nga tebalina bukuumi.

Yeegaanye eky’okukuma omuliro mu bantu n’agamba nti Rev. Dr. Sennyonyi bwe yabadde mu kakiiko, yannyonnyodde ng’alabika amutidde kubanga bangi balowooza nti abaamagye buli we babeera bagenda n’emmundu. Ettaka eryogerwako liri ku bulooka 99 poloti 9 e Ntaawo - Mukono.

Mu August wa 2016, Abalabirizi b’Ekkanisa ya Uganda bwe baagendayo okulirambula, abantu baali baagala kubookera mu bbaasi.

Ettaka lino ekkanisa erikaayanira ne Famire ya Ham Mukasa nga bagamba nti baali baabawa liizi egenda okuggwaako so ng’ekkanisa egamba nti ettaka Mukasa yaligiwa era mu kiseera kino baalissa mu mannya ga UCH Holdings.

More From The Author

Emboozi z’omuwandiisi endala

Emboozi endala

Avuganya Ssekandi ku ky'omu...

RICHARD SEBAMALA avuganya omumyuka wa Pulezidenti, Edward Kiwanuka Sekandi ku babaka bwa Palamenti obwa Bukoto...

Lubega

Ebikonde sibyevuma - Lubega

OMUGGUNZI w'ehhuumi, Joey Vegas Lubega annyuse ebikonde oluvannyuma lw'emyaka 23 bukya alinnya kigere kye ekisooka...

Donald Trump

Trump alemeddeko ku by'akal...

EBY’AKALULU ka ssaayansi byongedde Donald Trump n’ategeeza nga bw’ali omusajja omukulu atayinza kukkiriza kuleka...

Paapa eyawummula Joseph Aloisius Ratzinger

Paapa Joseph Aloisius Ratzi...

PAAPA Benedict XVI eyawummula ng’amannya ge ag’obuzaale ye Joseph Aloisius Ratzinger muyi. Ratzinger 93 obulwadde...

Abaabadde balambula ppaaka ekolebwa.

Abakola ppaaka enkadde bale...

Bakansala ba KCCA abatuula ku kakiiko akateekerateekera ekibuga n’okuzimba nga bali wamu n’abakugu baalambudde...