TOP
  • Home
  • Amawulire
  • Gavumenti eraze engeri Buganda gye yaggyibwa ku maapu ya Uganda

Gavumenti eraze engeri Buganda gye yaggyibwa ku maapu ya Uganda

Added 26th April 2018

GAVUMENTI eraze engeri gye baatuuka okuggya Buganda ku maapu ya Uganda, ekintu ekibadde kyewanisizza emitima gy’Abaganda.

Minisita w’eggwanga ow’ebyobulamu, ebisookerwako Sarah Opendi

Minisita w’eggwanga ow’ebyobulamu, ebisookerwako Sarah Opendi

Sarah Opendi, minisita omubeezi ow’ebyobulamu bwe yabadde mu Palamenti ku Lwokubiri ng’ekubirizibwa omumyuka wa Sipiika, Jacob Oulanyah yategeezezza nti, bwe baalondodde ensonga eno baazudde nga waaliwo omukozi wa minisitule eyakola ensobi n’akozesa maapu ya Uganda enkadde eyeeyambisibwa ku mulumbe gwa Obote1, etalaga kifo kya Buganda.

N’agamba nti, “nange kennyini kyanneewuunyisizza okulaba nga maapu tekuli Buganda ate ng’ebitundu bya Uganda ebirala kwe biri. Neetonda olw’ensobi eyakolebwa era mbakakasa nti, kino kigenda kutereezebwa era ku maapu endala ezinaddamu okufulumizibwa Buganda ejja kuba erambikiddwa bulungi”.

Minisita okwetonda kyaddiridde Johnson Muyanja Senyonga (Mukono South) era ssentebe w’akabondo k’ababaka ba Buganda okusaba Palamenti etangaaze ekyaggyisa Buganda ku maapu ya Uganda.

“Tukitwale nti Uganda yeggyeeko Buganda nga bwe tuludde nga tuwulira? Twagala Gavumenti etereeze ensobi eno mu bwangu ng’abantu ba Buganda tebannaba kukitwala nti beetwala bokka,” Senyonga bwe yategeezezza. Opendi baagenda kuwandiikira Kabaka ne Mmengo mu butongole nga beetonda olw’ensobi eyakolebwa.

Medard Lubega Seggona (Busiro East) yeebazizza minisita olw’okwetonda kyokka n’ategeeza nti kijja kubanguyira okubasonyiwa nga bamaze okutereeza ensobi gye baakola ku maapu.

N’agamba nti, ekijja okusanyusa Abaganda kwe kulaba ng’ensobi etereezeddwa era n’etaddamu kukolebwa.

Yeewuunyizza okuba nga bw’abeera ayingira Palamenti ku mulyango omunene alabawo ekifaananyi ekiraga ebitundu ebikola Uganda yonna nga ne Buganda kweri!

Diana Atwine, omuwandiisi ow’enkalakkalira owa minisitule y’ebyobulamu ye yasoose okuvaayo ku ntandikwa ya wiiki ne yeetonda olw’ensobi eyakolebwa abakozi ba minisitule gy’atwala.

Ensonga ya maapu ya Buganda, okuvaayo kyaddirira Kabaka okusinziira ku mukolo gw’amazaalibwa ogwali e Villamaria mu ssaza ly’e Buddu ne yeemulugunya olw’abaafulumya maapu ya Uganda ng’ekitundu kya Buganda tekiragiddwa.

Maapu eyasinga okuleeta obuzibu yali eraga engeri abaana gye baali bagemeddwaamu mu bitundu bya Uganda ebyenjawulo.

Ekitundu kya Buganda kyalagibwa nga North Central ne South Central, kyokka ebitundu ebirala nga, Bukedi, Bunyoro, Tooro, Ankole nga kwe biri.

More From The Author

Emboozi z’omuwandiisi endala

Emboozi endala

Mmotoka ya minisita Atwoki eyakubiddwa amasasi.

Minisita asimattuse amasasi

Minisita omubeezi avunaanyizibwa ku byenfuna mu offiisi y'omumyuka wa Pulezidenti, Dr Baltazar Kasirivu-Atwooki,...

Kiddu (ku kkono) ne munne.

Bannabyamizannyo abattiddwa...

Nga December 30 omwaka oguwedde, abantu abatamanyiddwa baasindiridde Isaac 'Zebra' Senyange, eyaliko kapiteeni...

Sserunjogi ng’alaga ebintu by’atonaatona omuli essaati, ebikopo n’ebirala ebikozesebwa mu kunoonya obululu okusikiriza abalonzi.

Sserunjogi kkampeyini aziko...

AWAGWA ekku tewabula kalondererwa, ekiseera kya kkampeyini bangi bakikozesezza okuyiiya ssente era gubeera mugano...

Ssentebe Andrew Kasatiiro ng'agezaako okunnyonnyola abaatafunye butimba.

Ab'e Jinja Kalooli batabuki...

Abatuuze b'e Jinja Kalooli mu Wakiso beeweereza ebisongovu n'abakulembeze baabwe lwa butabawa butimba bwa nsiri....

Kasibante ku mpingu  ng'akwatiddwa.

Agambibwa okugezaako okufum...

OMUSUUBUZI   aloopye omuvubuka ku poliisi n'amulumiriza  okumuggyiraayo ekiso amufumite abaduukirize ne bamutaasa....